गान्धीराज यसरि औधोगीक दुर्घटनामा परे
फोनिज कोरिया संवाददाता
सोल-सोमबार दिउसो मौसम धुम्मिएको थियो | हल्का हावा पनि चलिरहेको थियो | ख्यंगीदो ह्वासङ सीमा रहेको इलु सीएनपी कम्पनीमा कार्यरत मोरङ हत्तिमुढा-८ स्थायी बासिन्दा र हाल काठमाडौं बस्दै आएका गान्धीराज खतिवडा पनि आफ्नै ड्युटीमा थिए | फलाम पगालेर ठुल्ठुला मेसिनको पाटपुर्जा बनाउने कम्पनीमा अरु तीन नेपाली आ-आफ्नै विभागमा व्यस्त थिए |
पाटपुर्जा बनाउन फलामलाई १४ सय डिग्रीमा उमाल्नुपर्छ | यसरि उमालिएको फलामको झोल काठको फ्रेम र डाइको सहयोगमा आकार निकाल्नुपर्छ | अग्र र पाश्च भाग गरेर डाई १ हजारदेखि ४ हजार किलोसम्म गह्रौं हुन्छ |
गान्धीराजले १२ बजे कम्पनीकै सिक्ताङमा खाना खाएका थिए | प्राय धेरै नबोल्ने उनि केहि कोरियन र एक जना नेपाली साथीसंगै बसेर खाना खाएका थिए |
दुई वर्षअघि बिदामा गएर उनले बिहे गरेर आएका थिए | खाना खाएर घरमा श्रीमतीसंग फोन दुख सुख सन्चो बिसन्चो कुरा गरेका थिए | नियति कति निर्दयी हुन्छ | श्रीमतीसंग बोलेको केहि मिनेट नबित्दै उनले संसारबाट बिदा लिनुपर्यो |
करिब १२.५५ बजे उनि सधै काम गर्ने ठाउँमा काम गरिरहेका थिए | त्यतिनै बेला अरु बिभागमा काम गरिरहेका साथीहरुले ठुलो आवाज सुने | सधै आवाज आइरहने भए पनि सबै गान्धीराज भएतिर दौडिए | डाईले गंधीराजको आधा शरीर छोपेको अवस्थामा भेटियो | डाइको एक भाग ढलेर उनलाई च्यापेको रहेछ | तत्काल क्रेनले डाई उचाले पनि उनले संसार छोडी सकेका थिए |
अतिनै मिलनसार, सकारात्मक विचार भएका, नझर्किने र धेरै नबोल्ने गान्धीराजलाई गुमाएर ३ जना साथीहरु डाँको छोडेर रुने अवस्थामा छन् | यो बिबरण टिपाउने सुदिप कोइरालाको गला पटकपटक अबरुद्ध भयो | उनि बेला बेला घुँक्कघुँक्क गर्थे |
कोरियामा रहेका नेपालीहरुले काम गर्दा सधै सावधानी र सुरक्षा सामग्रीको प्रयोग जरुरि देखिएको छ |
