स्याङ्जा भिरकोट आठथर तमु समाज द. कोरियाको चौथो अधिवेशन डिसेम्बर ४ मा हुने

बोम्जन गुरुङ
३० नोभेम्बर २०२१, कोरिया

“आत्मीय सद्भाव, अनुशासन र गतिशीलता, मानवीय सहयोग गर्नु हाम्रो अभिभारा” भन्ने मूल नारालाई अनुशरण गर्दै सन् २०१५ मा स्थापित दक्षिण कोरियामा रहेको जातीय संस्था स्याङ्जा भिरकोट आठथर तमु समाजको अधिवेशन यही डिसेम्बर ४ तारिक सउलस्थित दोङ्देमुनमा हुने भएको छ ।

तेश्रो कार्यसमितिको सफलतापूर्वक कार्यकाल पूरा भएर आधिकारिक र विधिवत् रुपमै अर्को कार्यसमिति चयन गर्नुपर्ने आवश्यकतालाई ध्यानमा राख्दै सो अधिवेशन गर्न लागिएको समाजका अध्यक्ष देवेन्द्र गुरुङले जानकारी दिए ।

यस संस्थाले स्थापनाकालदेखि विशेष गरेर भिरकोट आठथर क्षेत्रका आपतकालिन विभिन्न समस्याहरुमा आर्थिक, भौतिक सहयोग उपलब्ध गर्दै आइरहेको छ । समाजले मौलिक तथा साँस्कृतिक कार्यक्रमहरु आयोजना गरेर तमू जातीको संस्कार, संस्कृति, परम्परा र अस्तित्व संरक्षणमा प्रत्यक्ष टेवा पुर्याईरहेको र यस समाजले विगत केही वर्षदेखि सउलस्थित दोङ्देमूनमा आवास गृह (सेल्टर) सञ्चालन गरिरहेको सन्दर्भ समाजका सचिव वाईबि गुरुङले उल्लेख गरे ।

नेपालको गण्डकी प्रदेश अन्तर्गत स्याङ्जा जिल्लामा अवस्थित प्रसिद्ध आँधीखोला नदीको दक्षिण-पुर्वी भागमा पर्ने साविकका गाविसहरु एलादी, मनकामना, माझकोट शिवालय, बानेथोक देउराली (भिरकोट आठथर) लगायत आसपासका अन्य स्थानदेखि कोरियामा रहेका तमू दाजुभाई र दिदी बहिनीहरु यस संस्थामा आबद्ध रहेका छन् ।

यस अधिवेशनलाई सभ्य र भब्य रुपमा सफल बनाउन संस्था सम्बद्ध सल्लाहकार, बुद्विजीवी, शुभचिन्तक, समस्त सदस्यहरुलाई स्याङ्जा भिरकोट आठथर तमु समाजले उपस्थितिको लागि हार्दिक अनुरोध गरेको छ ।

तपसिल :
मिति : २०२१ डिसेम्बर ०४, शनिबार
समय : बेलुका ७:०० बजे
स्थान : दोङ्देमुन, सउल कोरिया