तमू धीं कोरियाको दोश्रो बृहत बैठक सम्पन्न ।
बोम्जन गुरुङ
२५ जुलाई २०२१, कोरिया ।
कोरियामा रहेको अति सक्रिय जातीय संस्था तमू धीं दक्षिण कोरियाको दोश्रो बैठक सम्पन्न भएको छ । वर्तमान बढ्दो कोरोना कहर र जोखिमको कारण भर्चुअल जूम मार्फत संस्थाको कार्ययोजना अन्तर्गत विभिन्न बुँदाहरुमा छलफल गर्दै बैठक सम्पन्न भएको हो ।
संस्थाका अध्यक्ष लेसन गुरुङको अध्यक्षता र संरक्षक भिम गुरुङ (पर्वत) को प्रमुख आतिथ्यता रहेको सो कार्यक्रममा कोरियाबासी तमूहरुको तथ्यांक संकलन र सदस्यता वितरण सम्बन्धमा, तमू भाषा र लिपीको भर्चुअल सिकाई आयोजना सम्बन्धमा र शाखा संस्थाहरुसँगको सम्बन्ध तथा तमूहरुको आपसी सम्बन्ध सुधार लगायतको प्रस्तावहरुमा विशेष केन्द्रित रहेर छलफल गरिएको थियो । तमू धीं कोरियाका संरक्षक भिम गुरुङ (पर्वत), केन्द्रीय वरिष्ठ सल्लाहकार जीत गुरुङ, सल्लाहकारहरु खोमप्रसाद गुरुङ, मञ्जु गुरुङ, विजय गुरुङ, गोलमान गुरुङ, पूर्ण गुरुङ र तमू धीं ख्यङ्साङ्नाम्दो बुसान शाखाका अध्यक्ष अनिश गुरुङ लगायतले कार्यसमितिको उल्लेखित प्रस्तावहरुमा आफ्नो स्पष्ट धारणा सहित संस्थालाई थप चलायमान गराउन संस्थाले खेल्न सक्ने भूमिका र आगामी कार्ययोजनाको बारेमा सल्लाह र सुझाव दिएका थिए ।
उक्त जूम भर्चुअल कार्यक्रम केन्द्रीय महासचिव सन्तोष गुरुङले सञ्चालन गरेका थिए भने सहभागी संस्था सम्बद्ध सम्पूर्ण अग्रज र शुभचिन्तकहरुप्रति धन्यवाद व्यक्त गर्दै उहाँहरुको राय, सुझाव र विचार बमोजिम कार्यक्रमहरु कार्यान्वयन गरिने केन्द्रीय अध्यक्ष लेसन गुरुङले बताए । संगठन सचिव तुरन बहादुर गुरुङको संयोजकत्वमा केन्द्रीय सल्लाहकार मञ्जु गुरुङ, साँस्कृतिक विभाग उपसंयोजक लिलु गुरुङ, ख्याङ्साङ्नाम्दो बुसान शाखाका सचिव विक्रम गुरुङ र थेगु शाखाका सचिव बिल गुरुङ सदस्य रहने गरि पाँच सदस्यीय तथ्यांक संकलन तथा सदस्यता वितरण व्यवस्थापन समिति गठन गरिएको छ । यसका साथै संस्थाको केन्द्रीय र शाखाका कार्यसमिति, संरक्षक, सल्लाहकारहरु र विभागीय प्रमुखहरु लगायत सम्पूर्ण क्रियाशिल रहनुपर्ने निर्णय पारित गरिएको छ ।
