दक्षिण कोरियामा कामदारको तलब बढ्यो

नयाँ बर्ष सुरु भएसँगै दक्षिण कोरियामा कामदारको न्युनतम तलब बृद्धि भएको छ । गत वर्षको तलब भन्दा १.५ प्रतिशत बढि प्रतिघन्टा ८ हजार ७ सय २० वन (८ सय ७० रुपैया) पाउने भएका छन् । यो बर्ष कोरोना महामारिका कारण देशमा आर्थिक मन्दी भएको भन्दै सन् १९८८ देखि कै कम तलब बढेको हो ।
दैनिक ८ घन्टाको दरले हप्ताको ४० घन्टा काम गर्ने कामदारको न्युनतम ज्याला महिनामा १८ लाख २२ हजार ४ सय ८० कोरियन वन अर्थात झन्डै १ लाख ८२ हजार रुपैया हुनेछ । साथै ८ घन्टा भन्दा बढि काम गरे बापत ‘ओभरटाईम’ र सार्वजानिक विदाहरुमा काम गरे प्रतिघन्टा १३ हजार वन भन्दा बढि ज्याला पाउनेछन । त्यसैगरी राती १० बजे देखी बिहान ६ बजेसम्मको काम गर्ने कम्पनीमा रात्री भत्ता हुनेछ ।
गत जुलाईमा तलब निर्धारण समितीले आठौं पटक छलफल गर्दा पनि तलब कति बढाउने भन्ने सहमति नभए पछि नवौं बैठकले बहुमतका आधारमा यो तलब निर्धारण गरेको हो । सो बैठक कामदार पक्षले बहिस्कार गरेको थियो । समितिमा कामदार, ब्यवसायी र सरकारी पक्षको ९÷९ जना सदस्य रहने ब्यवस्था छ ।
ब्यवसायीहरुले गत बर्षको तलबमा २.१ प्रतिशत कटौती गरेर ८ हजार ४ सय १० वन बनाउने माग राखेको थिए भने कामदार पक्षले १६.४ प्रतिशत बृद्धि गरेर १०,००० वन (१ हजार रुपैया) बनाउन माग राखेका थिए ।
बृद्धि भएको तलबबाट दक्षिण कोरियामा रहेका ४० लाख कामदारसँगै ३५ हजार भन्दा बढि नेपाली कामदार पनि प्रत्यक्ष रुपमा लाभान्बित हुनेछन् । दक्षिण कोरियाका राष्ट्रपति मुन जे इनले निर्वाचनका ताका सन् २०२०÷२१ सम्म कामदारको तलब प्रतिघन्टा १० हजार कोरियन वन अर्थात झन्डै एक हजार रुपैया वनाउने जनाएका थिए । तर कोरोना भाइरसको महामारीका कारण यस पटक उल्लेखनिय रुपमा तलब बद्धि नभएको बताइन्छ ।
सन् २०१८ मा १६.४ र सन् २०१९ मा ११ प्रतिशत तलब बढाएको थियो । साना तथा मझौला ब्यवसायीले ब्यपक विरोध गरे पछि गत बर्ष २.९ प्रतिशत तलब बढेको थियो ।