कोरियामा निधन भएका खड्क बहादुर थापाको परिवारलाई स्याङ्जा परिवारद्धारा आर्थिक सहयोग

बोम्जन गुरुङ, दक्षिण कोरिया

१२ सेप्टेम्बर २०२०

ईपीएस प्रणाली मार्फत दक्षिण कोरियाको ख्यङ्जु शहर नजिकै एक कम्पनीमा कार्यरत सुतेकै अवस्थामा मृत भेटिएका ३३ वर्षीय खड्क बहादुर थापाको परिवारलाई राहत/सान्तवना स्वरुप स्याङ्जा परिवार दक्षिण कोरियाको नेतृत्वमा संकलित रु. एक लाख असी हजार हस्तान्तरण गरिएको छ ।

विशेषतः कोरियामा हुने गरेका हरेक दुःखद घटनाहरुमा सक्रिय उपस्थिति सहित विभिन्न सहयोग आइरहेको क्षेत्रीय संस्था स्याङ्जा परिवार दक्षिण कोरियाले मृतक थापाको परिवारको दुःखको घडीमा मल्हम लगाउने अभिप्रायले आर्थिक संकलन अभियानबाट संकलित रकम संस्थाका केन्द्रीय बरिष्ठ सल्लाहकार गुप्त गुरुङ, निवर्तमान केन्द्रीय सल्लाहकार नवराज वाग्ले, केन्द्रीय सदस्यद्धय डिल्लु बिरकट्टा मगर र सितल राना मगरले संस्थागत प्रतिनिधित्व जनाउँदै मृतकको पिता तिलचन थापा र माता नरमाया थापा, छरछिमेक, आफन्तजन लगायतको उपस्थितिमा सो सहयोग रकम प्रदान गरिएको हो ।

मृतक थापा स्याङ्जा जिल्लाको किचनास माथिल्लो चेप्टे घर भई विगत सात वर्षदेखि कोरियामा कार्यरत थिए । गत मे महिनाको १२ तारिक कम्पनीमा सुतेकै अवस्थामा मृत भेटिएका उनको पार्थिव शरीरलाई कोरोनाको कहर र लकडाउनका कारण नेपाल पठाउन असमर्थ भएकोले सोही महिनाको २४ तारिकमा विधुतीय विधिबाट कोरियामा नै दाहसंस्कार गरिएको थियो । यस्ताखाले सबै दुःखद घटनाहरुमा मानवीय संवेदनाहरुको मर्महरुलाई महसुस गर्दै परदेशी भूमिमा एक आपसमा बन्धुत्व र सहयोगी भावना राख्नुपर्ने धारणा संस्थाको केन्द्रीय अध्यक्ष युवराज गुरुङले स्पष्ट पारे ।

एक हप्ता अघि मात्रै स्याङ्जा गल्याङ इलुङ्गाका लिभर सिरोसिस बिरामी आशिष थापालाई संस्थाकै नेतृत्वमा संकलित सवा छ लाख रुपैंया सहयोग गरिएको थियो । संस्थाको हरेक गतिविधि र यो दुःखद घडीमा मृतक खड्क बहादुर थापाको परिवारमा सहानुभूति व्यक्त गर्दै सहयोग अभियानमा जोडिनुहुने समस्त सहयोगीहरुमा स्याङ्जा परिवार दक्षिण कोरियाले हार्दिक धन्यवाद व्यक्त गरेको छ ।