काेरियाबाट पठाइकाे काेराेना किट नेपाल सरकारलाई हस्तान्तरण
दक्षिण कोरियास्थित नेपालीहरूको आर्थिक सहयोगमा गैरआवासीय नेपाली संघले चार हजार वटा कोरोना भाइरस (कोभिड–१९) परीक्षण गर्ने किट नेपाल पठाएको छ । कोरियन एयरबाट नेपाल पठाइएका किट स्वास्थ्य मन्त्रालयका सचिव यादव प्रसाद कोइरालालाइ शनिवार हस्तान्तरण गरिएको छ।
किटबाट तीन घण्टामा नै कोभिड–१९ को संक्रमण भए/नभएको यकिन हुन्छ । दक्षिण कोरियामा हाल ६ वटा ठूला कम्पनीले मात्रै विदेशमा कोभिड–१९ परीक्षण किट निर्यात गरिरहेका छन् ।
संघले बिहीबार सोलस्थित नेपाली दूतावासलाई किनिएका किटको विवरण बुझाएको थियो । ‘एक व्यक्ति एक किट’ भन्ने नारासहित दक्षिण कोरियामा रहेका नेपालीबीच मार्चमा सहयोग संकलन गरिएको थियो ।
कोरियामा रहेका ४ हजार ६ सयभन्दा बढी नेपालीले १४ करोड ८४ लाख ५८ हजार ७ सय ६९ वन जम्मा गरेका थिए । दुई हजार कोरोना परीक्षण किट किन्ने भनेर सुरु गरिएको अभियानमा सहयोग धेरै जुटेपछि चार हजार किट किनिएको हो । बाँकी रकमले चीनबाट पीपीई दुई हजार सेट, एन–९५ माक्स १० हजार प्रति, सर्जिकल माक्स २० हजार वटा किनिएको छ ।
‘कोरोना परीक्षण किट नेपाल पठाउन विविध कारणले ढिल भए पनि हामीले अब नेपाल सरकारलाई बुझाएको छौं । दोस्रो चरणका रूपमा हामी चीनमा किनिएका सामान नेपाल पठाउँछौ,’ संघका अध्यक्ष यज्ञराज सुवेदीले भने । दक्षिण कोरियामा रहेका नेपाली देशलाई आवश्यक पर्दा एकजुट भएको पनि उनले बताए ।
कार्यवाहक राजदूत रामसिं थापाले दक्षिण कोरियामा रहेको नेपालीको एकताले राम्रो सन्देश दिने बताए । ‘दुई साताको अभियानमा यति धेरै नेपाली जुट्नु धेरै राम्रो हो । यी सामग्रीको उचित प्रयोग हुनेमा म ढुक्क छु,’ उनले भने ।
