कोरियामा तमू ल्होसार कार्यक्रमको तयारी पूरा, थेगू र किम्हेबाट नि:शुल्क बस सुविधा ।

अंग्रेजी नयाँ वर्षको जनवरी महिनाको पहिलो आइतबार ल्होसार मनाउँदै आएको परम्परा अनुसार यो पटक पनि २०२० जनवरी ०५ तारिक आइतबारका दिन सउल स्थितको सुविधा सम्पन्न हल Hotel Skypark Kingston Dongdaemun मा मनाउने भएको हो । यो तमू ल्होसार केन्द्रीय समितिको आयोजना र संस्थाका थेगु शाखा र ख्यङ्साङ्नाम्दो शाखाको संयुक्त सह-आयोजनामा एकै थलोमा कार्यक्रम आयोजना गरिने भएको छ । तमू धीं दक्षिण कोरियाले विगतमा झैं यो वर्ष पनि फो-ल्हो (मृग वर्ग) लाई विदाई गर्दै च्यु-ल्हो (मुसा वर्ग) लाई स्वागत गरि दिवा भोज, शुभकामना आदानप्रदान तथा विविध साँस्कृतिक कार्यक्रम आयोजना गर्ने भएको हो । तमू धींले यसपटकको कार्यक्रममा नेपालबाट चर्चित राष्ट्रिय कलाकार ल्याउने भएको छ । जसमा गीत रचनाकार, संगीतकार, नायक र आफैंमा कुशल गायक मनोज गुरुङ र नेपाली लोक तथा दोहोरी क्षेत्रमा अत्यन्तै चर्चित गायिका इन्द्रा गुरुङ आउने भएका हुन् । सो कार्यक्रममा आवत जावतमा थप सहजताका लागि तमूहरुको बाक्लो बसोबास रहेको र संस्थाको शाखा विस्तार भईसकेको कोरियाको दक्षिणी थेगु र बुसान क्षेत्रबाट नि:शुल्क बसको व्यवस्था गरिएको र तपसिलमा उल्लेखित नम्बरमा सम्पर्क गरि आफ्नो सीट सुनिश्चित गर्नुहुन आयोजकले आयोजकले आग्रह गरेको छ ।

नि:शुल्क बसको लागी ————————

थेगु तर्फ सम्पर्क नम्बर : तमू धीं थेगु शाखा अध्यक्ष हर्क गुरुङ 010-4543-8944

ख्यङ्साङ्नाम्दो/बुसान सम्पर्क नम्बर : तमू धीं ख्यङ्साङ्नाम्दो/बुसान शाखा अध्यक्ष, अनिस गुरुङ 010-2490-6139

उक्त दिन वर्ग (ल्हो) जाने र आउने तमू व्यक्तिहरुलाई मौलिक परम्परा अनुसार रुपा लगाई स्याई-स्याई गरिने र तमू (गुरुङ)को मौलिक बाजागाजा सहित छैंडु नाच, गुरुङ समुदायको लोपोन्मुख मारुनी नृत्य, कौरा नृत्य, स्थानीय कलाकारहरुको बेजोड साँस्कृतिक प्रस्तुति, हाँस्य प्रहशन र रमाईलो जमघट सँगै स्वादिष्ट नेपाली थुप्रै खानाको परिकारको व्यवस्था रहने आयोजकले जनाएको छ । कोरियामा रहेका सम्पूर्ण तमू (गुरुङ) एवं गैर तमू (गुरुङ) दाजुभाइ तथा दिदीबहिनीहरु, सबै संघ-संस्थाहरु, बुद्धिजीबीहरु, पत्रकारहरु, व्यवसायीहरुलाई हार्दिक निमन्त्रणा सहित सो कार्यक्रममा उपस्थित जनाई “तमू (गुरुङ) च्यु-ल्होसार २०७६” कार्यक्रम सभ्य र भव्य सफल पारिदिनु हुन तमू धीं दक्षिण कोरियाले हार्दिक अनुरोध समेत गरेको छ ।