चुम्लुङ बुसान र डिएसएमई याक्थुङ सयङ गजेदोले संयुक्त रुपमा चासोक तङ्नाम मनायो
किरात याक्थुङ चुम्लुङ दक्षिण कोरिया बुसान शाखा र डिएसएमई याक्थुङ सयङ गजेदोले डिसेम्बर २२ तारिख संयुक्त रुपमा चासोक तङनाम मनाएको छ। तङनाम विशेष कार्यक्रम किम्हे स्थित गाया युनिभर्सिटिको हलमा भब्यताका साथ मनाइएको थियो। कार्यक्रममा नेपालबाट आएका कलाकारद्वय यादन सेर्मा र डिल्ली फोम्बोको साँस्कृतिक एवम सांगीतिक प्रस्तुतिमा दर्शकहरु आनन्दले झुमेका थिए। गायक द्वयले आफ्ना आधा दर्जन बढी लिम्बू तथा नेपाली गीतहरुमा दर्शकहरुलाई मनोरञ्जन दिलाएका थिए। गीत संगीतका साथमा लिम्बू मौलिक परिकारहरु समेत ग्रहण गर्दै दर्शकहरु नाच्नमा ब्यस्त देखिन्थे।
याक्थुङ सयङ गजेदोका अध्यक्ष एवम कार्यक्रमका सेवा साबा चित्र आङ्देम्बेले चासोक/न्वागी पूजा गरेपछी सुरु भएको कार्यक्रममा चुम्लुङ केन्द्रको तर्फबाट आकर्षक केलाङ प्रस्तुत गरेका थिए। यसैगरी चुम्लुङ बुसानले पनि केलाङ साथै साँस्कृतिक नृत्यहरु राखेका थिए। कोरियामै रहेका कलाकारहरु प्रदिप कन्दङ्वा, ललित लिङ्दम, अर्जुन सुब्बा र उमेश मेवाहाङले पनि आ आफ्नो गायन प्रस्तुति राखेका थिए।
चुम्लुङ बुसानका सल्लाहकार वियोगी काइलाले चासोक तङनामको परिचय साथै महत्त्वपनि बुझाएका थिए भने सदस्य संजोक कन्दङ्वाले स्वागत मन्तव्य राखेका थिए। चुम्लुङ बुसान कोरियाका अध्यक्ष किरण कन्दङ्वाको सभापतित्व र चुम्लुङ कोरियाका अध्यक्ष अग्नि लिम्बूको प्रमुख आतिथ्यमा सम्पन्न तङनाम विशेष कार्यक्रममा विशेष अतिथिहरु गैर आवासिय नेपाली संघका अध्यक्ष यज्ञ सुवेदी, नेपाल आदिवासी जनजाती महासंघ बुसान शाखाका अध्यक्ष मिलन सोजे राईले शुभकामना मन्तव्य राखेका थिए भने कोरियामा रहेका विभिन्न संघ संस्थाका प्रतिनिधिहरु एवम नेपालीहरुको व्यापक उपस्थिति रहेको थियो। औपचारिक कार्यक्रम सुरेशसिंह सम्बाहाङ्फे र दोश्रो चरणको कार्यक्रम डम्बर सुब्बाले सञ्चालन गरेका थिए।
