तामाङ संघ कोरियाको वार्षिक साधारणसभा सम्पन्न, तामाङ सञ्चारकर्मीहरू सम्मानित
नेपाल तामाङ संघ दक्षिण कोरियाको नवौं कार्यसमितिको वार्षिक साधारणसभा कार्यक्रम सम्पन्न भएको छ । कार्यक्रम राजधानी सउलको दोङ्देमुनमा अवस्थित निक ट्राभलको सभाहलमा आइतबार सम्पन्न भएको हो । कार्यक्रमको अवसरमा दक्षिण कोरियामा रहेर पत्रकारिता गर्दै आएका ४ जनालाई सम्मान गरेको छ ।
संस्थाको अध्यक्ष मेघप्रसाद वाइबाको सभापतित्व र नेपाल आदिवासी जनजाति महासंघ दक्षिण कोरियाका अध्यक्ष युगेल तेन्डुप शेर्पाको प्रमुख आतिथ्यमा औपचारिक कार्यक्रम सम्पन्न भएको थियो । कार्यक्रममा अध्यक्ष वाइबाले तामाङ भाषा, संस्कृति र संरक्षण गर्दै तामसालिङ प्राप्त गर्नाकोलागी सबै एक भएर अगाडि बढ्नुपर्ने बताएका थिए । त्यस्तै जनजाति महासंघ कोरियाको अध्यक्ष शेर्पाले सम्पुर्ण उत्पीडित जातजाति सबै एकजुट भएर हाम्रो आफ्नो पहिचान प्राप्तिको लागि सशक्त रुपमा अगाडि बढ्नुपर्नेमा जोड दिएका थिए ।
विशेष अतिथिहहरूमा नागार्जुन गुम्बाका लामा प्रमुख उर्गेन लामा, सउल नेपाल गुम्बाका लामा प्रमुख कुन्साङ दोर्जे लामा, तामाङ समाज ख्याङ्साङनाम्दो बुसानका कार्यबाहक अध्यक्ष सुजित घिसिङ लगायत कोरियामा स्थापित विभिन्न संघसंस्थाको प्रतिनिधिहरुको उल्लेख्य सहभागिता रहेका थिए ।
साथै संघले कोरियामा रहेर सञ्चारमाध्यममा क्रियाशील ४ जना सञ्चारकर्मीहरू तेमाल अनलाइनका दुध बहादुर लामा, अनलाइन मिडिया वानका किशोर कुमार ब्लोन, सैलुङ अनलाइनका अमिर योञ्जन, फोनिज कोरियाका बिमल सिं लामालाई सम्मान गरेका थिए ।
अौपाचारिक कार्यक्रम पश्चात् भएको संघको साधारणसभा बाट संघको विधान समेत संशोधन गरिएको छ ।
सभामा संघको महासचिव गोकुल थोकरले वार्षिक प्रतिवेदन र कोषाध्यक्ष मनोज वाईबाले आर्थिक प्रतिबेदन प्रस्तुत गरेका थिए । साथै सभाद्वारा हालको आर्थिक समिति विघाटन गरि लेखा परिक्षक समिति गठन गरिएको छ ।
उक्त सभाको भेलाले सामाजिक कार्यमा क्रियाशील पर्वती मोक्तानलाई संघको सल्लाहकारमा चयन गरेको छ ।
