प्रवासी मजदुरहरुको बसोबास सम्बन्धि नयाँ नियम पारित, जुलाई १६ बाट लागू हुने
कोरियन सरकारको रोजगार तथा श्रम मन्त्रालय द्वारा प्रवासी मजदुरहरु बस्ने छात्रावास(खिसुक्सा) सम्बन्धि नयाँ नियम पारित गरेको छ । उक्त नियम यहि जुलाई १६ बाट लागू हुने जनाएको छ । यदि नयाँ कानुन अनुसारको छात्रावासको व्यवस्था नभएमा साहूले अनुमानि नदिएपनि प्रवासी मजदुरले कम्पनी परिवर्तन समेत गर्न पाउने छ ।
नयाँ नियमन अनुसार, रोजगार दाताले पुरुष र महिला प्रवासी मजदुरहरूको लागि अलग-अलग आवास क्वार्टरहरू उपलब्ध गराउनु पर्ने छ र एक कोठामा १५ जना भन्दा बढी कामदारहरू राख्न पाउने छैन ।
मन्त्रालयको अनुसार राष्ट्रपति कार्यलय च्यङ वा दइ(ब्लु हाउस)मा मंगलबार बसेको क्याबिनेट बैठकले विदेशी श्रमिकहरूको लागि छात्रावास सञ्चालन गर्दा, उनीहरूले पाउनुपर्ने न्युनतम सुबिधा अनिवार्य पाउन सकियोस् भनेर प्रवासी रोजगार प्रवर्द्धन विधेयक संशोधन पारित गरिएको हो । जस्ले प्रवासी मजदुरहरुको मानवाधिकारको रक्षा समेत गर्ने जनाएको छ ।
नयाँ नियमहरू यस्ता व्यवसायमा लागू हुनेछन् जस्ले प्रवासी श्रमिकहरूको लागि छात्रावास सञ्चालन गर्दछ र १६ जुलाई देखि लागु हुनेछ ।
संशोधन विधेयक अनुसार, महिला र पुरुष एउटै कोठामा बस्न पाउँदैनन् । फरक सिफ्टमा काम गर्नेहरुले एउटै कोठा प्रयोग गर्न नपाइने, कोठा कम्तीमा पनि प्रती ब्यक्ति २.५ वर्ग मिटरको हुनुपर्ने र एउटा कोठामा १५ जना भन्दा बढी बस्न नपाइने लगायतको नियम रहेको छ ।
त्यस्तै छात्रावासमा बस्ने सबैलाई न्युनतम आवस्यकताको कुराहरू जस्तै ट्वाइलेट, बाथरूम, सिङ्क(ह्यान्ड बेसन), लाइट, एयर कन्डिसनर, हिटर तथा आगो नियन्त्रण प्रणाली समेत जडान गरिएको हुनुपर्ने छ ।
आफ्नो व्यक्तिगत गोप्यनियताको सुरक्षाका लागि कोठा, बाथरूम तथा ट्वाइलेटको लक सिस्टम हुनुपर्ने छ । साथै आफ्नो सामान राख्ने दराज समेत व्यक्तिगत हुनुपर्ने जनाएको छ ।
उल्लेखित सुविधाहरुको बारेमा कम्पनीले विदेशी कामदारहरु सँग कन्ट्याक्ट् पेपरमा हस्ताक्षर गर्दा नै सम्पुर्ण जानकारी दिनुपर्ने छ । यो नियम E -9 र H -3 भिसामा कोरिया आएका प्रवासी मजदुरहरुको हकमा लागू हुनेछ जनाएको छ ।
“हामी विदेशी श्रमिकहरुको लागि न्यूनतम जीवनशैली सुरक्षित गर्ने कोसिस गरिरहेका छौँ । यदि उनीहरुले छात्रावासको न्युनतम सुविधा पाउन नसकेमा अर्को कम्पनीमा परिवर्तन गर्न अनुमति दिन्छौं ।” मन्त्रालयको अधिकारीलाई उदृत गर्दै कोरिया टाइम्सले लेखेको छ ।
