कोरियामा 'सुनकली' प्रदर्शन गरिने
फोनिज कोरिया संवाददाता
सोल
सुदूर पश्चिम समाज, कोरियाले आउँदो अगष्ट १६ तारिखमा कोरियामा रहेका नेपाली एवं इच्छुक कोरियन दर्शकमाझ अन्तर्राष्ट्रिय अवार्ड पाउन सफल चर्चित डकुमेन्ट्री फिल्म’सुनकली’ प्रदर्शन गर्ने भएको छ। सउल,दोंदेमुनमा समाजका अध्यक्ष जीतेन्द्र महताको अध्यक्षतामा बसेको ९ औं कार्यकारिणी समितिको दोस्रो बैठकले उक्त निर्णय गरेको जानकारी सचिव कमल शाहीले दिनु भएको छ।
‘सुनकली’ प्रदर्शनका लागि आवश्यक सम्पूर्ण तयारी गर्न कार्य समितिका सम्पूर्ण सदस्य र सल्लाहकार पदेन सदस्य रहने गरी प्राज्ञिक व्यक्तित्व डा. अग्नीराज कोइरालाको संयोजकत्वमा मूल समिति गठन गरिएकोछ।त्यस्तै अन्य सदस्यहरूमा डा.शेरबहादुर रावल,दिलीप रावल,शुभाष हमाल,प्रेम शाह,सुरेन्द्र भण्डारी,जनक धामी, धर्मराज जोशी,जितु उपाध्याय तिमिल्सिना,एल.बि. बिष्ट,कमल सिंह,चक्र बिष्ट,पदम भट्ट,करन बुढा, जगदीश बिष्ट,राज बोहरा,गोविन्द रावल,बालकृष्ण बोहरा,हिरो रावल, नवीन कार्की,पुरन नाथ, लभ लाइट भट्ट,दीपक गिरी,तेज खडका,सुजन रोकया र गजेन्द्र सिंह रहेका छन् भने हल प्रवन्ध,प्रचार प्रसार,स्वयंसेवक परिचालन, आर्थिक सहयोग संकलनका लागि समेत छुट्टाछुट्टै उप-समितिहरू गठन गरिएका छन्।बुसानका नेपाली दर्शकहरूका लागि समेत सुनकली प्रदर्शन गर्न मिति पछि तय गर्ने गरी समन्वय समिति गठन गरिएको छ।
पत्रकार भोजराज भाटद्वारा निर्देशित’सुनकली’ले नेपालको सबभन्दा विकट् कर्णालीको मुगुका किशोरीहरूको सानैदेखि फुटबलप्रतिको लगाव, अभ्यास र उनीहरूले पाएको सफलताको कथालाई वुलन्द गरेको छ।अहिले विभिन्न देशहरूमा भव्य प्रदर्शनका साथ चर्चाको शिखरमा रहेको उक्त डकुमेन्ट्री कोरियामा प्रदर्शन गर्ने मुख्य उद्देश्य कर्णाली र सुदूरपश्चिमका दुर्गम क्षेत्रको शिक्षा विकासमा सहयोग गर्ने रहेकाले कोरियामा कार्यरत बुद्धिजीवी, ब्यापारी, विद्यार्थी, समाजसेवी सम्पूर्ण संघसंस्थाका प्रतिनिधि र सुपका सबै साथीहरूमा उक्त कार्यक्रमलाई भव्यताका साथ सफल पार्न सहयोगका लागि सुदूरपश्चिम समाज, कोरियाले अपिल गरेको छ ।
