दक्षिण कोरियामा मोती जयन्तीको अवसरमा बृहत रचना वाचन हुने

अन्तराष्ट्रिय नेपाली साहित्य समाज (अनेसास) दक्षिण कोरियाले मोती जयन्तीको अवसरमा बृहत रचना वाचन हुने भएको छ । सेप्टेम्बर २३ हुने कार्यक्रममा कोरियामा रहेका नेपाली सर्जकहरुले आफ्ना रचनाहरु वाचन गर्नेछन् ।

कार्यक्रमका संयोजक गंगा बस्नेतले व्यस्त देशमा रहेर पनि नेपाली भाषा साहित्यमा कलम चलाउने युवाहरु प्रशस्त रहेको र विषेश गरी गजल धेरै फस्टाएको बताए । ‘गजल लेख्नेहरु धेरै छन् । साहित्यका अन्य क्षेत्रमा भन्दा यसमा बढि नै आकर्षण देखिन्छ ।’ उनले भने । अनेसास कोरियाको प्रस्तुतिमा गजल एल्बम नै तयार पारेको र अब छिट्टै नै विमोचन हुने संस्थाका अध्यक्ष प्रमोद सारंगले बताएका छन् ।
नेपाली साहित्यको माध्यमिककालमा शृङ्गारधाराका प्रवर्तक राष्ट्रिय विभूति मोतीराम भट्टको १५३औँ जन्मजयन्ती देशविदेशमा विभिन्न साहित्यिक कार्यक्रमको आयोजना गरी मनाइन्छ । आदिकवि भानुभक्तको जीवनी पहिलोपटक प्रकाशनमा ल्याउनुका साथै नेपालमा छापाखानासमेत भित्राएका थिए । उनी नेपालीमा गजल लेख्ने सुरुका गजलकारहरुमा पर्छन् । विसं १९२३ साल भाद्र कृष्ण कुशे औँसीका दिन जन्मेर विसं १९५३ साल भाद्र कृष्ण कुशे औँसीकै दिन ३० वर्षमै मृत्यू भएका भट्टले नेपाली साहित्यमा महत्वपूर्ण योगदान पुर्याएका छन् ।
अनेसास कोरिया च्याप्टरले हरेक बर्ष प्रदान गर्दै आएको “अनेसास कोरिया संगीत सम्मान” यो बर्ष युवा गायक रमेश सङ्ग्रोलालाई दिने भएको छ । अनेसास कोरिया संगीत सम्मानबाट यसअघि गायक राज सिग्देल, संगीतकार डी. आर अटु, सि पि मगर सम्मानित भएका थिए ।
बृहत रचना वाचन कार्यक्रम दोङदेमुनको शुभेच्छा होटलको सभाहलमा हुने छ ।