म्याराडोना फिफा अध्यक्षमा उठ्ने
फोनिज कोरिया संवाददाता
सान्टियागो – महान् अर्जेन्टिनी फुटबलर डिएगो म्याराडोनाले अन्तर्राष्ट्रिय फुटबल महासंघ (फिफा) मा सेप ब्लाटरको स्थानपूर्तिका लागि अध्यक्ष हुने निर्णय गरेका छन् । उनले यस्तो निर्णय उरुग्वेका लेखक तथा पत्रकार भिक्टर ह्युगो मोरालेसलाई बताएका हुन् ।
ब्राजिलका पूर्वखेलाडी जिकोपछि फिफाको अध्यक्षमा लड्ने घोषणा गर्ने म्याराडोना अर्का ‘हाइप्रोफाइल’ पूर्वखेलाडी हुन्।
लाइबेरियाको राष्ट्रिय फुटबल संघका अध्यक्ष मुसा बिल्टीले पनि फिफा अध्यक्षमा आफूलाई दाबेदारको रूपमा प्रस्तुत गरेका छन्।
यसैगरी फिफाको अधिल्लो निर्वाचनमा वर्तमान अध्यक्ष सेप ब्लाटरलाई चुनौती दिएका जोर्डनका राजकुमार अली बिन अल हुसेनी र यूईएफएका प्रखुम मिचेल प्लाटिनीलाई समेत फिफाको आगामी अध्यक्षका रूपमा हेरिएको छ।
आफ्ना विभिन्न क्रियाकलापका कारण बेलाबखत चर्चामा आइरहने ५४ वर्षीय म्याराडोनाको फिफा अध्यक्षमा उठ्ने विषयलाई पनि यसैको अर्को कडीका रूपमा हेरिएको छ।
कहिले लागूपदार्थको दुव्र्यसन त कहिले प्रेमप्रसंगका कारण चर्चामा आउने म्याराडोनाले सन् २०१० मा अर्जेन्टिनाको राष्ट्रिय टोलीको प्रशिक्षकको जिम्मेवारीसमेत सम्हालेका गरेका थिए।
उनी त्यसमा सफल भने हुन सकेनन्। दक्षिण अफ्रिकामा भएको विश्वकप फुटबलमा म्याराडोना अर्जेन्टिनी टोलीका प्रशिक्षक थिए। विश्वकपको समाप्तिसँगै उनले पदत्याग गरेका थिए।
सन् १९८६ मा अर्जेन्टिनालाई विश्वकपको उपाधि जिताउन मुख्य भूमिका निर्वाह गरेका म्याराडोनालाई ब्राजिलका पेलेसँगै विश्व फुटबलका सर्वकालीन महान् खेलाडी मानिन्छ।
सन् १९७७ देखि सन् १९९४ सम्म उनले अर्जेन्टिनाका तर्फबाट खेलेको ९१ खेलमा ३४ गोल गरेका थिए। म्याराडोनाले बोका जुनियर्स, नेपोली, सेभिलजस्ता चर्चित क्लबबाट पनि व्यावसायिक फुटबल खेलेका थिए।
