नेपाल–कोरिया सांस्कृतिक केन्द्रद्वारा भूकम्प प्रभावित विद्यार्थीलाई सहयोग
फोनिज कोरिया संवाददाता
सोल – भुकम्प प्रभावित विद्यार्थीलाई कोरियाबाट नेपाल आएका समाजसेवीहरुले स्टेशनरी सामग्री प्रदान गरेका छन् । सिन्धुलीको तीनकन्या गाविस वडा नं. ९ स्थित बत्सला माध्यामिक विद्यालय दिङदिङ किराते पुगेर कोरियाली समाजसेवीहरुले स्टेशनरी सामग्री प्रदान गरेका हुन् । उनीहरुले भूकम्पबाट प्रभावित विद्यार्थीहरुलाई कपी, कलम, औजार बक्स लगायतका सामग्री दिएका थिए ।
स्कूललाई खेल सामग्रीहरु फुटबल, भलिबल, नेटका साथै नोटबुक, कलम लगायतका सामग्री उपलव्ध गराएको छ । ३०१ विद्यार्थी रहेको विद्यालयमा पहिलोपटक सहयोग पाउँदा विद्यार्थीहरु खुशी थिए ।
सहयोगका लागि कोरियाबाट आएका नेपाल–कोरिया सांस्कृतिक केन्द्रका अध्यक्ष मञ्जु गुरुङ, साहित्यकार किम ह्योङ ह्यो, चो बोङ की र ली योङ होको टोली विद्यालय पुगेका थिए । यसैबीच, मेत्ता परिवार लुम्बिनीले उपलव्ध गराएको त्रिपाल र बिस्कुट समेत सोही अवसरमा वितरण गरिएको थियो । सहयोग कार्यक्रमको स्थानीय संयोजन भने रिलिफ नेपालले गरेको थियो ।
