दिपावली साँझ मनाउन नेपाल आइडल टप ४ सागर आले कोरिया आउदै

कोरियाको महान चाड छुसकमा यस पटक पनि कोरियामा थुप्रै सांगीतिक कार्यक्रमहरु हुँदै छन् । विभिन्न सामाजिक संघसंस्थाहरुले कोरियाको विभिन्न स्थानमा सांगीतिक कार्यक्रमहरु गर्ने क्रममा नेपालबाट थुप्रै ख्यातीप्राप्त कलाकारहरु कोरिया आउने भएका छन् । जसमध्ये दक्षिण कोरियाको दोस्रो ठुलो शहर बुसानमा पनि आगामि अक्टोबर ३ तारिख दिपावली साँझ कार्यक्रमको आयोजना हुने भएको छ ।

‘सामाजिक सद्भाव र बृहत नेपाली एकता आजको आवश्यकता’ भन्ने नाराका साथ आपतकालिन राहत कोष स्थापनार्थ नेपाल आदिवासी जनजाती महासँघ बुसान शाखाले ‘दिपावली साँझ’ कार्यक्रमको आयोजना गर्ने भएको हो । कोरियाको मुख्य पर्व छुसकको अवसर पारेर छुसकको पहिलो दिन अक्टोबर ३ तारिख बुसानमा हुन लागेको उक्त दिपावली साँगीतिक साँझमा नेपाल आइडलका प्रतियोगी सागर आलेका साथमा  चर्चित गायिका मेलिना राई,  मोडल तथा नायिका एलिसा राई, गायक ताराप्रसाद लिम्बू, राजेश पूमा राई, बबिना किराती, एकदेव लिम्बूलगायतको प्रस्तुति रहने भएको छ ।

बुसानको मिन्जु खौङवान (मिन्जु पार्क) मा दिनको १२ बजे सुरु हुने उक्त साँगीतिक कार्यक्रमलाई सफल पारिदिनको लागि सम्पूर्ण कोरियावासी नेपालीहरुलाई उपस्थितिको लागि आयोजकले आग्रह गरेको छ ।

नेपाल आदिवासी जनजाती महासँघ दक्षिण कोरियाको बुसान शाखालाई व्यवस्थित र सुचारु रुपमा अगाडि बढाउन तथा आपतकालिन राहत कोष स्थापनार्थ आयोजना गर्न लागिएको उक्त कार्यक्रमबाट उठेको केही रकम बुसानस्थित नेपाली प्रवासी महिला समूहद्धारा संचालित महिला आवास गृहको लागि पनि सहयोग गर्ने महासंघ बुसानका सचिब दोस्तीहाङ राईले बताए । नेपाल आइडलमा टप ४ सम्म पुग्न सफल सबैले रुचाएका बहुमुखी प्रतिभाका धनी गायक सागर आले र सर्वाधिक रुचाइएकी स्वरकी धनी गायिका मेलिना राई तथा ठमेल बजारकी सुन्दरी अर्थात नायिका एलिसा राईको बेजोड प्रस्तुतिले पनि कार्यक्रम भब्य हुने आयोजकको दावी छ ।