वैदेशिक रोजगारीमा गएका नेपाली मृत्यु भए परिवारले अब २२ लाख रुपैयाँ पाउने
काठमाण्डौ
विदेशमा काम गर्न गएका नेपालीहरुको उतै मृत्यु भए आर्थिक राहत स्वरुप उनका परिवारले अब २२ लाख रुपैयाँ पाउने भएका छन् । बैदेशिक रोजगार बोर्डबाट ७ लाख र जीवन विमा वापत १५ लाख गरी २२ लाख पाउने भएका हुन् । यस बाहेक तोकिएको रोगबाट मृत्यु भएमा थप ५ लाख पाउनेछन् । यसभन्दा पहिला बोर्डबाट मृतकका परिवालाई ३ लाख रुपैयाँ दिने व्यवस्था थियो ।
सरकारले बैदेशिक रोजगार नियमावली २०७४ को संशोधन गरेपछि बोर्डले दिने आर्थिक राहत रकम बृद्धी भएको हो । श्रम स्वीकृती लिएका कामदार साउन १६ देखि जुनसुकै कारणले मृत्यु भएपनि ७ लाख रुपैयाँ पाउने बोर्डका कार्यकारी निर्देशक रधुराज काफ्लेले बताएको कान्तिपुले उल्लेख गरेको छ । विदा वा विरामी भई करार अवधिभित्रै नेपालमै मृत्यु भएपनि राहत रकम पाउनेछ ।
बोर्डले कल्याणकारी कोषबाट दिइने राहत रकम वृद्धी गरेसंगै शुल्क पनि बढाएको छ । तीन वर्षको श्रम करार अवधिको लागि १५ सय र त्यो भन्दा बढीको लागि २५ सय रुपैयाँ शुल्क तिर्नु पर्ने भएको छ ।
२०७३ साल बैशाख १ देखि श्रम स्वीकृती लिई विदेश गएका कामदारहरुलाई १५ लाख जीवन विमाको व्यवस्था गरिएको छ । त्यस्तै सोही वर्पाको माघ १५ देखि श्रम स्वीकृती लिएका कामदारले १५ प्रकारका गम्भीर रोग लागेमा थप ५ लाख विमाको पनि व्यवस्था गरेको छ ।
बोर्डले वैदेशिक रोजगारीमा गएका कामदार विरामी भए , अंगभंग वा मृत्यु भए ७ लाख रुपैयाँ सम्म आर्थिक राहत दिने भएको छ । मृतक कामदारको सन्तानलाई १२ कक्षासम्म निशुल्क पढाइदिने, परिवार विरामी भए ५० हजार बराबरको उपचार खर्च दिने व्यवस्था गरिएको छ ।
विदेशमा जेलमा परेका कामदारलाई कानुनी खर्च वापत वकिल शुल्क समेत दिने व्यवस्था गरेको छ । तर अदालतले तोकेको जरिवाना भने दिइने छैन् ।
२०६४ माघबाट बोर्डले कामदारको हितको लागि राहत दिन थालेका हुन् । हालसम्म बोर्डमा चार अर्व १० करोड रकम जम्मा भएको छ । भरखरै थपिएको सुविधा प्रदान गर्न बोर्डले वार्षिक एक अर्बसम्म खर्च हुने अनुमान गरेको कान्तिपुरमा उल्लेख गरिएको छ ।
