कोरियामा एक नेपालीको उपचारक्रममा मृत्यु

सोल

अवैधानिक रुपमा दक्षिण कोरिया रहेका एक नेपालीको उपचारको क्रममा मृत्यु भएको छ । घोराही नगरपालिका १० पुरानो बसपार्क दांगका ५२ बर्षिय दिल बहादुर घर्तिमगरको बिहिबार अपरान्ह मृत्यु भएको हो ।

२४ बर्ष देखि कोरियामा रहेका घर्तिमगर बिना भिषा कोरियामा कार्यरत थिए । गत महिना नेपाल फर्कन लागेका घर्तिमगरलाई कागजात नपुगेको जनाउदै अध्यगमनले फिर्ता गरेको थियो । त्यस लगत्तै बिरामी परेका उनको सौल नेशनल अस्पतालमा उपचार भइरहेको थियो । चिकित्सकहरुले उपचारको क्रममा हेपाटाइटिस बि को लक्षण रहेको जानकारी गराएका थिए । दुइ साता देखि उपचाररत घर्तिमगरलाई मृत्यु पुर्व निमोनिया पनि देखिएको चिकित्सकहरु बताएका थिए ।

घर्तिमगरको उपचार खर्चमा लागेको दुइ करोड २० लाख वन अस्पताललाई तिर्न बाकी रहेको छ । अवैधानिक रुपमा रहेकाहरुको स्वास्थ्य बिमा नहुने कारणले उपचार खर्च बढेको हो । अवैधानिक रुपमा कार्यरत नागरिकको शवलाई नेपाल पठाउन लाग्ने खर्च सरकारले उपलब्ध गराउने प्रावधान छैन । बिना भिषा कार्यरतको मृत्यु भएमा आफन्तको साथै बिभिन्न संघसस्थाको सहयोगमा रकम संकलन गरि शव नेपाल पठाउने प्रचलन छ । शव नेपाल पठाउदा ४ लाख रुपयाँ भन्दा बढी रकम खर्च हुन्छ ।

घर्तिमगरको मृत्यु बारे जानकारी प्राप्त भएको जानकारी दिदै सोल स्थित नेपाली दुतावासका श्रम सहचारी देवराज ढकालले परिवारको आवेदन पश्चात शव पठाउने प्रक्रिया गरिने बताए ।