तमु धीँको साधारणसभा हुँदै, जनवरी १ मा तमु ल्होसार मनाउने
फोनिज कोरिया संवाददाता
सोल, तमु धीँ दक्षिण कोरियाको निर्वाचित सातौं कार्यसमितिको प्रथम साधारण सभा नोवेम्बर २० मा गर्ने निर्णय गरेको छ। गत आइतबार धीँको कार्यालयमा बसेको कार्यसमितिको बैठकले उक्त निर्णय गरेको अध्यक्ष प्रदिप तमुले जानकारी दिए ।
साधारणसभालाई सफल पार्न संगठन सचिव सुनिल तमुको संयोजकत्वमा कोरियाको विभिन्न शहरमा रहेका तमुहरुलाई जिम्मेवारी तोक्दै संगठन बिस्तार गर्न जिम्मेवारी तोकिएको छ।
जसानुसार बुसानमा रिता तमु, थेगुमा मानसिंह तमु, फेन्थेकमा रामकाजी तमु, सुवनमा अरुण तमु, सिओलमा हिमान्शु तमु, उइजम्बुमा विशाल तमु र राज कुमार तमुलाई जिम्मेवारी तोकिएको छ। साधारणसभा नोवेम्बर २० तारिख आइतबार दिनको १२ बजे नेपाल हाउसमा हुनेछ ।
साधारण सभाको दिन तमु धीँको भलिबल खेलाडीहरुलाई सम्मान गर्नुका साथै संस्थाको वार्षिक आय ब्ययको विवरण सार्वजनिक तथा भावी कार्ययोजनाहरु तय गरिने हुँदा कोरियामा रहेका सम्पुर्ण तमुहरुलाई साधारण सभाको दिन उपस्थित भैदिनु हुन विशेष अनुरोध गरेको छ।
साथै हरेक वर्ष मनाउँदै आईरहेको तमु महान् पर्व ल्होसार यसपाली २०१७ को जनवरी १ तारिखमा विगतका वर्षहरुमा झैँ विविध कार्यक्रमहरुको आयोजना गरि मनाउने निर्णय गरेको छ । तमु ल्होसार २०७३ मुल आयोजक समिती तथा आवश्यक अन्य विभिन्न उपसमितीहरुको गठन अर्को बैठकमा गरिने महासचिव श्रीराम तमुले बताए ।
नोवेम्बर २० र जनवरी १ को दिनमा कार्यक्रमहरु नजुदाई दिन तमु धीँले सम्पुर्ण कोरियामा क्रियाशिल संघसंस्थाहरुमा अनुरोध गरेको छ । सोही बैठकमा अक्टोबर १६ मा धींले प्रदर्शन गरेको नेपाली चलचित्र झुम्की प्रदर्शनको समिक्षा गरिएको थियो । आशातित व्यापार गर्न सफल नभए पनि कोरियाबासी नेपालीहरुले दर्शाउनुभएको माया, साथ र सहयोगप्रती धीँको तर्फबाट आभार व्यक्त गरेको थियो ।
