कोरियामा शक्तिशाली तुफान, बुसानमा चारजनाको मृत्यु
फोनिज कोरिया सम्वाददाता
दक्षिण कोरियामा मंगलबार रातीदेखि बुधबार दिउँसोसम्म शक्तिशाली तुफान आएको छ । मंगलबार जेजु टाँपूबाट सुरु भएको आँधीबेहेरी तुफान बुधबार बिहानदेखि कोरियाको दक्षिणी भेगमा दिनभर आएको थियो । विशेषगरी दक्षिणी भेगका केही क्षेत्रमा प्रति सेकेन्ड ५६.५ मिटरको हूरी बतास चल्नुका साथै दुई सय पचास मिलिमिटर भन्दा बढी पानी परेको थियो । हुरी बतास र झरीका कारण केही ब्यक्ति घाइते हुनुका साथै बुसानमा चार जनाको मृत्यु भएको कोरियन समाचार एजेन्सीले जनाएको छ ।
आँधी तुफानका कारण समुद्र नजिक नजान अनि घरमा पनि होशियारी अपनाउन सर्वसाधारणलाई जानकारी गराइएको थियो । कोरियाको दक्षिणी भेगमा रहेको विभिन्न शहर तथा ग्रामिण भेगहरुमा ठुलो बर्षाका कारण घरभित्रै पानी पसेको थियो । यो वर्षको १८ औं तुफानका कारण केही समय अघि क्यङजुलाई केन्द्रविन्दू बनाएर गएको भूकम्पले क्षति पुर्याएको घरहरुमा झनै असर परेको थियो । त्यस्तै डुबानले गर्दा अण्डरग्राउण्ड पार्किङमा राखिएका गाडीहरु डुब्नुकासाथै कतिपय घरभित्र पानी पसेका छन् ।
आँधीहूरी र झरीका कारण बुधबार केही विद्यालय र सेन्टरहरुको पठनपाठन पनि स्थगित गरिएको थियो । जेजुमा ठुलो आँधी हूरीका कारण विधुतिय तारमा क्षति पुगेकोले ५२ हजार घरमा असर परेको थियो । त्यस्तै जेजु र बुसानको हवाइ उडान समेत रद्ध हुनुका साथै राष्टिय तथा अन्तराष्टिय पानी जहाज मार्ग पनि स्थगित गरिनुका साथै कोरिया उच्च गतिको केटिएक्स रेल पनि हावा हूरीका कारण रोकिएको सुरक्षा मन्त्रालयले जनाएको छ ।
