लुम्बिनी बिकासकोषको उपाध्यक्ष पदमा भिक्षु निग्रोध
दिलिपसिंह कुलुङ
लुम्बिनी ५ जेठ । अन्र्तराष्ट्रिय पर्यटकीय स्थल लुम्बिनी स्थित लुम्बिनी बिकास कोषको उपाध्यक्ष पदमा भिक्षु निग्रोधलाई नियुक्ति गरिएको छ । लामो समयदेखि रिक्त रहेको उपाध्यक्ष पदमा वैशाख १७ गते वेसेको मन्त्री परिषदको वेैठकले भिक्षुलाई नियुक्ति गर्ने निर्णय गरेको हो ।
पूर्व निर्णय बमोजिम भिक्षु निग्रोधलाई लुम्बिनी विकास कोषका अध्यक्ष एवं संस्कृति मन्त्री दिपकचन्द्र अमात्यले दुई वर्ष कार्यकालको लागि नियुक्ति पत्र दिएपछि उनी गत सोमबारदेखि कार्यालयको कार्यभार संहालेको लुम्बिनी विकास कोषले जनाएको छ ।
काठमाडौंको पाटन निवासी भिक्षु निग्रोधले त्रिभुवन विश्वविद्यालयबाट समाजशास्त्र तथा मानवशास्त्र विषयमा स्ताकोत्तर गरेका छन् । करिब २५ वर्षदेखि भिक्षु जीवन व्यतित गर्दै आएका उनी विश्व शान्ति बुद्धिस्ट विद्यायलका प्राचार्य, सुखी होटु नेपालका सभापति, संघका अध्यक्ष, थेरावादा बुद्धिस्ट एसोसियसनका सह सचिव, गुम्बा विहार व्यवस्थापन समितिका कार्यकारी सदस्य पदमा समेत जिम्मेवारी सम्हालिसकेको व्यक्तित्वलाई लुम्बिनीको उपाध्यक्ष पदमा जिम्मेवारी पाए पछि लुम्बिनी विकास कोषको निर्माण कार्यमा तिव्रता आउने लुम्बिनीवासीले स्वागत योग्य कदमको रुपमा लिन थालेका छन् ।
स्थानीय बौद्ध समाजका अध्यक्ष भिक्षु विवेकानन्दले उपाध्यक्ष निग्रोधको लुम्बिनी आगमनलाई स्वागत गर्दै सफल कार्यकालको कामना समेत गरेका छन् ।
यसअघि कोषका पूर्व उपाध्यक्ष भिक्षु कर्मा साङवो शेर्पाले माघ ५ गते आन्तरिक कारण देखाई दुई वर्ष कार्यवधि वांकी छदैं राजीनामा दिए पछि उपाध्यक्ष पद रिक्त रहदै आएको थियो ।
