ईपीएस भाषा परीक्षा असोज २ र ३ मा परीक्षाफल कार्तिकमा आउने
देवेन्द्र सम्बाहाम्फे
सोल– रोजगार अनुमती प्रणाली (ईपीएस) अन्तर्गत छैटौं कोरियाली भाषा परीक्षा असोज पहिलो हप्ता हुने निश्चित भएको छ । सोमबार श्रम तथा रोजगार राज्यमन्त्री टेकबहादुर गुरुङको अध्यक्षतामा वसेको निर्देशक समितिको वैठकले निर्णय गरे अनुसार असोज २ र ३ गते गते परीक्षा संचालन हुने भएको हो ।
वैशाख १२ गतेको महाविनाशकारी भुकम्प र त्यसपछिको शक्तिशाली पराकम्पनहरुका कारण पूर्व निर्धारण गरिएको जेष्ठ ३० र ३१ गते छैठौं कोरियन भाषा परीक्षा संचालन गर्न असहज भएपछि एचआरडी कोरियासंग भएको समझदारी वमोजिम असोजमा सारिएको हो ।
ईपीएस परीक्षा यसअघि काठमाडौंमा मात्र परिक्षा संचालन हुँदै आएकोमा यो बर्षदेखी काठमाण्डौं र पोखरासहित दुई केन्द्रबाट संचालन हुने ईपीएस शाखा नेपालले जनाएको छ । उपत्यका बाहिर परीक्षा संचालन हुनलागेको यो पहिलो पटक हो । परीक्षाफल कातिर्कमहिनामा प्रकाशित हुने ईपीएस शाखा नेपालका निर्देशक डिल्लीराम बस्तोलाले बताए ।
एचआरडी कोरियासंग परामर्श गरेर दुई हप्ताभित्र परीक्षाको बिस्तृत बिबरण सार्बजनिक गरिने बास्तोलाले कान्तिपुरलाई बताए । बिस्तृत बिबरणमा परीक्षा केन्द्र , स्कील टेस्ट, जब एप्लिकेसन, मेडिकल टेस्टका मिति तोकिने छन् । परीक्षाको कोर्समा कुनै परिवर्तन नभएको पनि बास्तोलाले जनाए ।
छैटौं भाषा परीक्षाका लागि गत २०७२ बैशाख ३ देखि ६ गतेसम्म आवेदन संकलन गरिएको थियो । काठमाडौं उपत्यकाभित्र पाँच स्थान र उपत्यका बाहिर पाँच क्षेत्रबाट ५१ हजार ३ सय जनाले आवेदन फारम भरेका थिए ।
कोरियाको साना तथा मझौला उद्योगहरुमा अदक्ष कामदारको रुपमा २०१६ को कोटाबाट भित्र्याउने गरि लिन लागिएको यो बर्षको परीक्षाबाट उत्पादनमुलक क्षेत्रतर्फ ४ हजार ९ सय र कृषि तथा पशुपालन क्षेत्रतर्फ २ हजार २ सय गरि ७ हजार १ सय अनुमानित उतीर्ण सङख्या एचआरडी कोरियाले तोकेको छ ।
कोरियाले औद्योगीक उत्पादन, कृषि , मत्स्य,कन्स्ट्रक्सन र सेवा क्षेत्रमा आवश्यक पर्ने अदक्ष कामदार नेपालसहित १५ मुलुकबाट आपूति र्गर्दै आएको छ । नेपाली कामदार भने औद्योगीक उत्पादन र कृषि क्षेत्रमा मात्र आउने गरेका छन् ।
नेपाल र कोरियाबिच सन् २००७ को जुलाई २३ मा यस सम्बन्धी एमओयूमा हस्ताक्षर भएपछि नेपाली युवा कोरिया आउन सुरु गरेका हुन् । थोरै लागतमा मासिक १ लाख रुपैयाँभन्दा बढी कमाइ हुने भएकाले कोरिया नेपाली युवाहरुको आकर्षक बैदेशिक रोजगार गन्तब्य बनेको छ । हाल २८ हजार नेपाली युवा यहां कार्यरत छन् ।
