भिरकोट आर्थर तमु समाज कोरियाको समर क्याम्प पिकनिक सम्पन्न
धन गुरुङ , सोल ।
स्याङ्जा भिरकोट आर्थर तमु समाज दक्षिण कोरियाले समर क्याम्प पिकनिक भब्य रुपमा सम्पन्न गरेको छ । कोरियामा गर्मी बढेसंगै पिकनिकको लहरको बिचमा उक्त समाजले पिकनिक आयोजना गरिएको थियो ।
संस्थाका अध्यक्ष नर कुमार गुरुङको अध्यक्षतामा सम्पन्न कार्यक्रमको प्रमुख अतिथिमा नेपाली दूतावास दक्षिण कोरियाका सहचारी रमेश गैरे रहनुभएको थियो भने अतिथिहरुमा संस्थाकै सल्लाहकारहरु अमन गुरुङ, सतिश गुरुङ , बिपना गुरुङ र समाजसेवी युवराज गुरुङ रहनु भएको थियो । उक्त कार्यक्रममा बोल्दै सहचारी गैरेले कोरियामा सम्पुर्ण नेपाली संघसंस्थाहरु सामाजिक अभियन्ताको रुपमा अगाडी आउनुपर्नेमा जोड दिनुभयो । उहाँले प्रवासी भुमीमा रहेर पनि स्याङ्जा भिरकोट आर्थर तमु समाजले सम्पुर्ण नेपालीहरुमा भाइचारा बढ्ने काम गरेको भन्दै नेपालीहरुलाई जोड्ने पुलको माध्यम बनाउन यस्ता खाले कार्यक्रमहरु आयोजना गरिरहनुपर्ने बताउनुभयो । सोही अवसरमा समाजका नवआगन्तुक सदस्यहरु टक गुरुङ, भौसरी गुरुङ र हरि माया गुरुङलाई स्वागत गरेको थियो ।
समर क्याम्प पिकनिकमा जाऔँ, आपसी भाइचारा अभिवृद्धि गर्दै प्रवासी थकित मन पिकनिकसंगै रमाऔँ भन्ने उदेश्यका साथ गत शनिबार र आइतबार सो पिकनिक आयोजना गरिएको थियो । दोङ्देमुनबाट राती १० बजे छुटेको बस करिव ३ घन्टाको यात्रापछि कोरियाको पुर्वी तटीय खोङ्वान्दोको सोक्चोमा पुगेको थियो। नेपाली परिकारसंगै कोरियन खानाको स्वादमा उपस्थितहरुले रमाइलो गरेका थिए । बाक्लो उपस्थिति रहेको सो कार्यक्रमको स्वागत मन्तव्य उपाध्यक्ष सन माया गुरुङ र संचालन सचिव धन गुरुङले गर्नुभएको थियो ।
