कोरियाबाट करोडौं रुपैयाँ सहयोग जुट्दै
देवेन्द्र सम्बाहाम्फे
सोल–नेपालमा गतहप्ता गएको विनाशकारी भूकम्पमा परेर घरबारबिहिन भएका नेपालीहरुलाई सहयोग गर्न कोरियन उधोगपति,कालाकार,राजनीतिज्ञ,परोपकारी सस्था र सर्वसाधारणले करोडौं रुपैयाँ जम्मा गरेका छन् ।
सोलस्थित नेपाली राजदूताबासले जनाए अनुसार सोमबार केबिएस टेलिभिजनले २ करोड रुपैयाँ हस्तान्तरण गरेको छ । सहयोग रकम टेलिभिजनका प्रमुख छो दे ह्यन र छोरोक उसान चिल्ड्रेन फाउन्डेसन निर्देशक लि छे हुनले संयुक्त रुपमा कोरियाका लागि नेपाली राजदूत कमानसिंह लामालाई हस्तान्तरण गरेका थिए । रकम मध्ये १ करोड रुपैयाँ नायक सोङ इल गुकले प्रदान गरेका हुन् । रकम प्रदान गर्दै प्रमुख ह्यनले केबीएसले अरु थप सहयोगका लागि अनलाइन क्याम्पेन भइरहेको जानकारी दिए ।
भूकम्प पिडितलाई सहयोग गर्ने सिलसिलामा कोरियन सेलिब्रेटीले पनि साथ दिएका छन् । यहाँका नायक, नायिका, गायक, कमेडियन, निर्देशक र खेलाडीलेमात्र होइन इन्टरटेन्मेन्ट कम्पनिहरुले समेत सहयोग गर्ने घोषणा गरेका छन् ।
कोरियामै चर्चित वाईजी इन्टरटेनमेन्ट कम्पनिले आज १ करोड रुपैयाँ सहयोग गर्ने घोषणा गरेका छ । उसले युनिसेफ कोरियामार्फत भूकम्पमा परेका बालबालिकाको सहयोगका लागि रकम जम्मा गरेको जनाएको छ । सहयोग रकम जम्मा गर्न कम्पनिले ‘विथ वाइजी’ नामक क्याम्पेईन संचालन गरेको थियो । कम्पनीले २ वर्षअघि नेपालमा सुबिधासम्पन्न बिद्यालय समेत स्थापना गरेको थियो ।
त्यस्तै अभिनेत्री कीम हेजाले पनि १ करोड रुपैया सहयोग प्रदान गरेकी छिन । अन्तरष्ट्रिय गैर सरकारी संस्था वल्ड भिजनमार्फत किमले सो रकम प्रदान गरेकी हुन् । सो सस्था मार्फत गायक कीम दो ह्वानले ३६ लाख , नायिका पार्क सिन ह्येले ३० लाख रुपैयाँ सहयोग गरेका छन् ।
कोरियाका केहि उद्योग ब्यवसायी र परोकपकारी संस्थाहरुले नेपाली राजदूतावासको ‘महाभूकम्प उद्धार राहत कोष’ मा पनि जम्मा गरेका छन् । उक्त कोषमा सोमबारसम्म ५ करोड रुपैयाँभन्दा बढी जम्मा भएको दूतावासले जनाएको छ । कोषमा कोरियाका बिभिन्न कम्पनि तथा सस्थाहरुले सहयोग रकम जम्मा गरेका हुन् । प्राप्त सहयोग रकम,उद्धार राहत शुक्रबारसम्ममा नेपाल पठाइने उपनियोग प्रमुख बर्तौलाले जानकारी दिए । भूकम्प पीडितको सहयोगका लागि दूताबासमा कार्यरत ५ कर्मचारीले एक महिनाको तलब राहत कोषमा जम्मा गर्ने भएका छन् ।
