एक हजार जनाको नाम कोरिया जाने रोस्टरबाट हट्दै
काठमाडौं – रोजगार अनुमति प्रणाली (ईपीएस)मार्फत दक्षिण कोरिया जानका लागि योग्य सूची (रोस्टर)मा रहेका मध्ये १ हजारको नाम हट्ने भएको छ । सन् २०१३ मा भाषा परीक्षा उत्तीर्ण गरेका कामदारको रोस्टर अवधि २ वर्ष पुगेकाले नाम हट्न लागेको हो ।
सन् २०१३ मा उत्तीर्णमध्ये करिब हजार कामदारको अझै पनि श्रमसम्झौता आइनसकेकाले कोरिया जाने सूचीबाट हट्न सक्ने सम्भावना रहेको ईपीएस कोरिया शाखाले जनाएको छ । सूचीबाट नाम कोरियाको मानव संशाधान विभाग (एचआरडी)ले हटाउनेछ । ती कामदार २ वर्षदेखि कोरिया जाने पर्खाइमा छन् । रोस्टरबाट हट्नेमध्ये कृषि क्षेत्रमा उत्तीर्णहरू हुन् । कृषि क्षेत्रमा नेपालीको न्यून माग छ । सन् २०१३ मा ८ हजार ५१ कामदार उत्तीर्ण भएका थिए ।
“सन् २०१३ भाषा परीक्षा उत्तीर्ण भएका मध्ये १ हजार कामदारको रोस्टरको अवधि सकिन लागिसक्यो, त्यही कारण अबको श्रमसम्झौतामा २ वर्षअघि उत्तीर्ण कामदारलाई प्राथमिकता दिन कोरियासँग कूटनीतिक पहल गरिरहेका छौं,” ईपीएस कोरिया शाखा प्रमुख डिल्लीराम बाँस्तोलाले भने, “त्यसमा प्राथमिकता दिए रोस्टरमा परेर कोरिया जान नपाइने कामदार न्यूनमात्रै हुनेछन् । सकेसम्म भाषा परीक्षा उत्तीर्ण सबै कामदारलाई पठाउने लक्ष्य छ ।”
उत्तीर्ण भएका मध्ये अधिकांश कामदारलाई पठाउन अवैध दर कम गर्ने, प्रक्रिया छिटो र पारदर्शी बनाउन लागिरहेको बाँस्तोलाले बताए । कोरियाले कोटा तोक्दा पनि यही व्यवस्थालाई आधार मान्छ । “रोस्टरमा परेर जान नपाएका कामदार वार्षिक रूपमा घटिरहेका छन्,” उनले भने, “यो हाम्रो उपलब्धि हो ।” सन् २०११ मा ४ हजारको नाम रोस्टरबाट हटेको थियो । २०१३ को सूचीबाट हजारको र २०१४ बाट सयजना कामदारको नाम हट्ने अनुमान शाखाको छ ।
२ महिनाको अवधिमा कामदारको नाम क्रमशः हट्दै जानेछ । “रोस्टरको सूची एकैपटक बनेको हुँदैन, केहीको १ साताअघि केहीको १ महिनापछि रोस्टर बनेको हुन्छ,” बाँस्तोलाले भने, “त्यही कारण फरक–फरक समयमा रोस्टरबाट नाम हट्नेछ ।”
कोरियाले पनि रोस्टरमा रहेका कामदार बढी जाउन् भन्ने उद्देश्यले कमलाई मात्र उत्तीर्ण गराउन थालेको छ ।
