सुनकली हेरेपछि

हिजो आइतबार अर्थात जनवरी २४ तारिक दक्षिण कोरियाको मौसममा सबैभन्दा चिसो हुने दिन थियो | यहाँका संचारमाध्यमहरुले माइनस २०डिग्री रहेको जानकारी दिइरहेका थिए । बाहिर निस्कनु मुस्किल हुदाहुदै आफ्नो काम गर्ने कम्पनीबाट २ घण्टा टाढा ‘मुगुकी मेस्सी’ भनेर चिनिएकी ‘सुनकली डकुमेन्ट्री’ फिल्म हेर्न पुगें । सुनकलीको जिबनमा आधरित ‘सुनकली’ डकुमेन्ट्री फिल्म हेर्ने उत्सुकताले सबै बाधा र ब्यबधान पन्छाईदियो।  सुनकलीलाई नजिकबाट हेर्ने हठ मनबाट हट्न सकेको थिएन । अन्ततः त्यो मेरो हठ पूरा पनि भयो यो सबैको लागि सुदुर पश्चिम समाज दक्षिण कोरियालाई धन्यवाद ।

एउटै भुमिमा रहेर पनि मात्र सुनेकी थिए मुगुको बारेमा त्यहाँको जनजिवन र बस्तुस्थितीको राम्रो ज्ञान भने थिएन म मा ।  परदेशी भुमिमा आएर फिल्मी रुपमा भए पनि त्यो ठाँउको सामाजिक परिवेश, स्थानिय संस्कृति अनि जनजिबनलाइ राम्रोसँग नियाल्ने मौका मिल्यो । मार्मिक र हृदयबिदारक कथाले साँचिकै मन रुवाएको थियो । सोच्न बाध्य बनायो, मनमा अमिट दृश्य बनेर पात्रको हरेक संघर्ष  छछल्किरहेको छ । जुन कुरा हेर्न मुस्किल छ त्यही जीवन कसैको बास्तबिकता हो ।

शिक्षा, स्वास्थ्य, खेलकुद अनि यातायात सम्पुर्ण कुरामा पिछडिएको  मुगु जिल्ला अनि त्यहाँका बासिन्दाको सोच पनि उस्तै देखिन्थ्यो । खै कुन शब्दमा बयान गरौं ।  देशको राजनितिमा धेरै परिबर्तन भईसक्यो | संबिधान पनि पायौं | देश चलाउने माननीयहरु पनि बेलाबेलामा परिबर्तन भइरहेकै छन तर खोइ अहिलेसम्म पनि जनताको समस्या र सोचलाइ परिबर्तन गर्न सकेको ?  समाज जंगली युगमा छ भनेर किन नबुझेको ? यस्ता अनेक अनुत्तरित प्रश्नहरु मनमा जन्मिन्छन | म त भन्छु नेपाल सरकारलाई शहरका घरघरमा ग्यासको पाइप लिएर आउनु भन्दा पहिले नेपालका ती बिकट ठाउँ र एक छाक खान पनि धौ धौ दुखी जनता माथी ध्यानआकर्षण होस। त्यस्तै छोरा र छोरिमा हुने भेदभाव कहिले अन्त्य हुन्छ हाम्रो समाजमा?? मेरो मनमा ज्वारभाटा झैं उठिरहने अर्को प्रश्न हो | जति बिकसित समाजका पात्र हौं भने पनि सुनकली जस्तो कथाले हाम्रो समाजको चरीत्र चित्रण गरेको पाएँ |

अनेक चुनौतीका बाबजुद निरन्तरको लगाव र संघर्षले जति अबिकसित क्षेत्र, जति पनि अभाव र चुनौती भए पनि  छोरिले छोरा सरह  गर्न नसक्ने कुरा के छ र ? उसले पनि गर्न सक्छे भन्ने  कुराको सन्देश वास्तविक जिवनमार्फत सुनकली र उनका साथिहरुले फुटबल खेल र यसमा उनिहरुको रुचि र हाँसिल गर्न पाइलै पिच्छेका संघर्षले बताउँछ । सुनकली र उनका साथिहरुलाई सफलाताको अनि त्यहाँका जनताले छिटै खुशिको सुखिको सास फेर्न पाउने छ्न भन्ने मेरो  कामना छ।

-दक्षिण कोरिया