बुसानमा कबड्डी कबड्डी देखाइने
दक्षिण कोरिया ः रामबाबु गुरुङको निर्देशनमा बनेको नयाँ नेपाली चलचित्र ‘कबड्डी कबड्डी’ मंसीर ११ गते शुक्रबारदेखि काठमाडौंलगायतका विभिन्न सहरहरुमा एकसाथ प्रदर्शन गरिने भएको छ । सोही चलचित्र दक्षिण कोरियामा समेत प्रदर्शनीमा आउने भएको छ ।
यहि नोभेम्बर २९ तारिख आइतबार एभरेष्ट एफसी बुसानको आयोजनामा प्रदर्शन हुन लागेको हो । गत वर्षको उत्कृष्ट चलचित्रको राष्टिय पुरस्कार पाउन सफल चलचित्र कबड्डीको दोस्रो भागको रुपमा प्रस्तुत गरिएको नेपाली चलचित्र ‘कबड्डी कबड्डी’ मा पनि दयाहाङ राई, सौगात मल्ल र निस्मा गुरुङ मुख्य भूमिकामा देखिएका छन् ।
मनी एट्याक्स मनी भनेजस्तै लभ एट्याक लभ यही नाराका साथ फिल्ममा बीरकाजी सोल्ठिनीको पछि लाग्छन् । अघिल्लो कबडडीमा सोल्ठिनीको माया पाउनका लागि बीरेकाजी (दयाहाङ राई) ले गरेको संर्घष यसमा पनि जारी छ । हाँस्यव्यङयसहितको मनोरञ्जनात्मक चलचित्र कबड्डी कबड्डीमा पुस्कर गुरुङ, कविता आले, पशुपति राई, बुद्धि तामाङ, उपेन्द्रं सुब्बा, शिशिर बाङदेललगायतका कलाकारहरुले अभिनय गरेका छन् ।
दिउसो एक बजे बुसान स्टेशन नजिक मिन्जु खोङवन (डेमोक्रेसी पार्क) मा प्रदर्शन गरिने चलचित्र हेर्नको लागि १५ हजार वन टिकट दर राखिएको छ । कोरियाको नयाँवर्ष सलनालको अवसरमा आयोजना गरिने एभरेष्ट एफसी कपको पूर्व तयारीको लागि चलचित्र प्रदर्शन गर्न लागिएको आयोजकले जनाएको छ ।