लगानीको सुवर्ण अवसर , १ करोड बढीको साधारण सेयर आउदै
सोल – देशको राजनीतिक अवस्थाका कारण लगानीको वातावरण नहुँदा प्राथमिक सेयरमा सर्वसाधारणको आकर्षण बढिरहेको छ । प्राथमिक सेयरमा लगानी गर्ने विचारमा हुनुहन्छ भने रकम छुट्याइराख्नुहोस् । चालु आर्थिक वर्ष भित्रमै विभिन्न कम्पनीको एक दर्जन कम्पनीको १ करोड भन्दा बढीको सेयर बजारमा आउदैछ । त्यसमध्ये केहीले निष्कासन अनुमति पाइसकेका छन् भने अधिकांश अनुमतिको प्रक्रियामा रहेको नेपाल धितोपत्र बोर्डले जानकारी दिएको छ ।
बोर्डका अनुसार एक दर्जन कम्पनीले १ अर्ब ६ करोड रुपैयाँ बराबरको १ करोड ६ लाख कित्ता साधारण सेयरका निश्कासनका लागि धितोपत्र बोर्डमा आवेदन दिएका छन् । समृद्धि विकास बैंक, सिभिल क्यापिटल, सिनर्जी पावर डेभलपमेन्ट (स्थानीयवासी), शिखर इन्स्योरेन्स (एफपिओ), मेट्रो माइक्रोफाइनान्स वित्तीय संस्था, रिलायन्स लोटस फाइनान्स (एफपिओ) र ग्रिन डेभलपमेन्ट बैंकले प्राथमिक निष्कासनका लागि बोर्डमा आवेदन दिएका हुन् । ती कम्पनीबाट पेस हुन आएका आवेदनमध्ये केहीका कागजपत्र पूरा नभएको तथा केही अध्ययनका क्रममा रहेको बोर्डले बताएको छ ।
बोर्डले चालु आवमै जलविद्युत् विकास कम्पनी, ङादी ग्रुप पावर कम्पनी र खानीखोला हाइड्रोपावर कम्पनीलाई प्राथमिक सेयर निष्कासन अनुमति दिएको थियो । त्यसमध्ये जलविद्युत् विकास कम्पनीले सर्वसाधारणका लागि सेयर निष्कासन गरिसकेको छ भने ङादीले सोमबारबाट स्थानियको लागि आवेदन खुल्ला गरेको छ ।
