कोरियामा भीम कार्कीको मृत्यु रहस्यमय

सोल-झुण्डिएको अवस्थामा आइतबार भेटिएका भोजपुर  देउराली ९ का भीम  कार्कीको मृत्यु रहस्यमय रहेको स्थलगत भ्रमण गरेर फर्केका उनका भाइ अमरबहादुर कार्की र साथीहरुले दाबी  गरेका  छन् |

घटनाको जानकारी पाएपछि आइतबार नै त्यहाँ पुगेका अमर र  भीमका साथी नुवाकोटका शिबप्रसाद भट्टले  घटनास्थलको प्रकृति हेर्दा भीमको मृत्यु रहस्यमय देखिएको दाबी गरेका हुन् |

अमरबहादुरलाई प्रहरीले देखाएको फोटो अनुसार भीमको  टोपी, गमबुट , माक्स र पन्जा लगाएकै अवस्थामा  जस्ताको तस्तै रहेको थियो भने एउटा खुट्टा खुम्चिएको थियो | झुण्डिएर आत्महत्या गर्नेहरुको खुट्टा प्राय समान अवस्थामा रहने गर्छ |
घटनास्थलमा झुण्डीनलाई आवश्यक हुने कुर्सी,टेबल केहि नरहेको उनीहरुले बताए |घटना रहस्यमय रहेको प्रहरीले समेत स्वीकार गरेको घटनास्थल र स्थानीय प्रहरी कार्यलयमा पुगेर फर्केका  भट्टले  बताए |

भीम छल्लाबुक्दो,छङगुपमा रहेको हाँस फारममा कार्यरत थिए | ३० महिना अघि आएका उनि गत शुक्रबार बिहान ११ .३० बजेदेखि सम्पर्कबिहिन थिए भने आइतबार ३ नम्बर हाउसमा झुण्डिएको अवस्थामा फेला परेका थिए |उनि साहुसंगै बस्दै आएका थिए |

शुक्रबार बिहान ११ बजेदेखि हराएको भए पनि साहुले आइतबार मात्र नजिकै चर्चको पास्टरलाई जानकारी गराएका थिए |त्यो क्षेत्रमा नेपाली कामदारको संख्या न्यून रहेको छ |

कार्की कै गाउले सगेन्द्र घलेका अनुसार भीम राम्रो परिवारका हुन् | अंग्रेजी बिषयमा स्नातकोत्तर (एमएम) दोश्रो बर्ष अध्ययन  गर्दागर्दै कोरिया आएका हुन् | घलेका अनुसार साहुबाट ४ महिनाको तलब लिन बाँकि रहेको थियो | बाँकि तलब माग्दा साहुले आफुलाई पिट्न खोज्ने गरेको भीमले सुनाएको घलेले जानकारी दिए |

घलेले भने  ‘भीमले जब तलबको कुरा आउछ तब मलाई साहुले पिट्न खोज्छ भन्थ्यो |’ घलेका अनुसार कम्पनि परिवर्तन गर्ने अनुमति पटक पटक मागे पनि साहुले मानेका थिएनन् |

भीमले हालसम्म नेपाल पैसा नपठाएको खुलेको छ | उनको दुई पासबुक फेला परेको र त्यसमा करिब २ करोड वन बचत रहेको जनाइएको छ |

भीमको  कोठामा  डायरी र  कपि फेला परेको भट्टले बताए | भट्टका अनुसार उनले बेलाबेला दैनिकी लेख्ने गर्थे | भने एउटा कपीमा तनाब उत्पन्न र त्यसको ब्यबस्थापन बारे नोट तयार गरेका छन् | साहुले दिने गरेको मानसिक तनाब कम गर्न उनले यस्तो नोट तयार गरेको हुन सक्ने अनुमान गरिएको छ |

दाइले आत्महत्या गर्नुपर्ने कुनै घरायसी कारण नभएको अमरबहादुरले बताए | पारिवारिक समधुर सम्बन्ध भएको र हरेक दिन आफुसंग कुरा भैरहेको अमरले बताए | संगै बस्ने र खाना खाने मान्छे ३ दिन सम्म साहुले थाहा नपाउनु र प्रहरीले देखाएको फोटोको आधारमा पनि घटना रहस्यमय रहेको अमरले बताए |

पोस्ट मार्टम भोलि हुने  र घटनाको तथ्य  विवरण त्यसपछि आउने भीमको परिवारले आशा  गरेका   छन  |  दूताबासका अधिकारीहरु पनि भोलिमात्र त्यस तर्फ जाने बताइएको छ |