नेपाली यु–१६ फुटबल टोलीमाथि प्रतिबन्ध
काठमाडौं – बढी उमेरका खेलाडी सहभागी गराएको भन्दै एसियाली फुटबल फेडेरेस (एएफसी) ले नेपाललार्इ यु-१६ च्याम्पियन्सिप खेल्न अयोग्य घोषित गरेको छ ।
क्रगिस्तानको बिस्केकमा अघिल्लो महिना भएका तीनवटा छनोट खेलमा १६ वर्षमाथिका तीनजना खेलाडी सहभागी गराएको भन्दै कारबाहीस्वरूप एएफसीले नेपाललार्इ च्याम्पियन्सिप खेल्न अयोग्य घोषित गरेको हो ।
नेपालले च्याम्पियन्सिपको छनोट चरणका जोर्डन, अाेमान र किर्गिस्तानविरूद्धका खेलामा १६ वर्षमाथिका तीन खेलाडी खेलाएको जनाएको छ । छनोट चरणका दुर्इवटा खेलमा विजय तथा एउटामा पराजय भोगेको नेपाली टिम उत्कृष्ट समूह उपविजेता हुँदै सन् २०१६ भारतमा हुने यु-१६ च्याम्पियन्सिपमा छानिएको थियो । एएफसीले नेपाली यु-१६ फुटबल टिमलार्इ भारतमा हुने च्याम्पियन्सिप खेल्न अयोग्य घोषित गरेको पत्र यसअघि नै अखिल नेपाल फुटबल संघ (एन्फा) लार्इ पठाइसकेको बताइएको छ ।
एएफसीले जोर्डन, ओमान र किर्गिस्तानविरूद्धको छनोट खेलमा एएफसी अनुशासन संहिताको अनुच्छेद ५५.१ को उल्लंघन गरेको ठहर गर्दै एन्फालार्इ १४ हजार ५ सय अमेरिकन डलर जरिबाना गराउने पनि निर्णय गरेको छ । त्यसैगरी एएफसी अनुशासन संहिताको अनुच्छेद ३१ अनुसार तीन टिमसँगको नतिजा उल्ट्याउँदै ती सबै खेलको नतिजा नेपाललार्इ पराजित घोषित गरिएको छ ।
त्यसैगरी संहिताको अनुच्छेद ६८ को उल्लंघन गरिएको ठहर गर्दै एएफसीले अखिल नेपाल फुटबल संघलार्इ थप १० हजार अमेरिकन डलर पनि जरिबाना गराएको छ । एएफसीले यसैगरी अबका दिनमा पनि नियम उल्लंघन गर्दै गएमा भविष्यमा एएफसीले गर्ने प्रतियोगितामा नेपाललार्इ भाग लिनबाट बञ्चित गरिने पनि चेतावनी दिएको छ।
बारम्बार गल्ती गर्दै गएमा यो भन्दा पनि कडा कारबाही नेपालले भोग्नुपर्ने चेतावनी एएफसीले एन्फालार्इ दिएको हो । किर्गिस्तानमा भएको एएफसी यू-१६ छनोट चरणको खेलमा उत्कृष्ट उपविजेताका रूपमा नेपाल च्याम्पियनसिप छनोट भएको थियो।
समूह चरणको अन्तिम खेलमा ओमनसँग ३-१ गोलले पराजित भए पनि नेपाल उत्कृष्ट उपविजेताका रूपमा एएफसी यू-१६ च्याम्पियनसिपका लागि छनोट भएको थियो। भारतमा आगामी वर्ष आयोजना हुने च्याम्पियनसिपमा उत्कृष्ट उपविजेताका रूपमा छनोट हुने चार टोलीमा नेपालसहित यूएई, भियतनाम र थाइल्यान्ड थिए।
समूह चरणको अन्तिम खेलमा नेपालले ओमनसँग बराबरीमात्र खेलेको भए समूह ‘बी’को विजेता बन्ने मौका थियो तर अन्तिम खेलमा लय गुमाएको नेपाल भाग्यमानी उपविजेता बन्दै अन्तिम १६ मा पर्न सफल भयो।
समूहको अघिल्ला दुई खेलमा सानदार प्रदर्शन गरेको नेपालले पहिलो खेलमा बलियो प्रतिद्वन्द्वी जोर्डनलाई २-१ गोलले हराएको थियो। दोस्रो खेलमा नेपालले घरेलु टोली किर्गिस्तानलाई ४-२ गोलले पराजित गरेको थियो।
समूहगत चरणको अन्तिम अर्को खेलमा घरेलु टोली किर्गिस्तानले जोर्डनलाई पराजित गरेपछि नेपालको भाग्य खुलेको थियो। एसियाका ४५ राष्ट्र सम्मिलित छनोट खेलमा सहभागीलाई ११ समूहमा विभाजन गरिएको थियो।
समूह विजेता बन्दै उज्वेकिस्तान, ओमान, इराक, साउदी अरेबिया, इरान, कुवेत, मलेसिया, उत्तर कोरिया, दक्षिण कोरिया, अस्ट्रेलिया र जापान फाइनल चरणका लागि छानिएका थिए। आयोजक भारत भने स्वतः छनोट भएको थियो ।
