ईपीएस परिक्षा हालसम्म २ लाख ५ हजारले दिए
सोल-दक्षिण कोरियाको साना तथा मझौला उद्योगहरुमा अदक्ष कामदार पठाउन नेपालमा रोजगार अनुुमति प्रणाली (ईपीएस) को परीक्षा हालसम्म छ पटक संचालन भएको छ । ईपीएसको ६ वटा सस्करणमा कुल २ लाख ५ हजार २ सय ९८ जनाले परीक्षा दिएका छन् ।
प्रत्येक परीक्षामा नेपाली युवाहरुले उत्साहजनक रुपमा आवेदन दिए पनि उतीर्ण संख्या ज्यादै न्यून रहेको छ । हालसम्मको तथ्यांक अनुुसार उतीर्ण सख्या २०.३५ प्रतिशत अर्थात ४१ हजार ७ सय ९५ मात्र रहेको छ ।
नेपाल र कोरिया बिच सन् २००७ को जुलाई २३ मा ईपीएस सम्बन्धी सम्झौता भएपछि २००८ मा पहिलो पटक परीक्षा संचालन भएको थियो । पहिलो परीक्षामा ३१ हजार ५ सय २५ सामेल थिए भने ६ हजार ७ सय ८६ उतीर्ण भएका थिए ।
त्यस्तै २०१० मा ३६ हजार २ सय २ , २०११ मा ५० हजार ४३ र २०१३ मा ४४ हजार १ सय २२ नेपाली युुवाले ईपीएस परीक्षा दिएका थिए ।
गत असोज २ र ३ गते सम्पन्न छैटौं परीक्षा ४३ हजार बढीले दिएका छन् । काठमाडौं र पोखरामा भएको परीक्षामा ४३ हजार ४ सय ६ जनाले परीक्षा दिएका हुन् । यसपालिका लागि ५१ हजार १ सय ३७ जनाले आवेदन भरेका थिए ।
परीक्षा काठमाडौंमा १५ र पोखरामा ३ गरि १८ केन्द्रमा संचालन गरिएको थियो । काठमाडौंबाट ३६ हजार १ सय २१ ले र पोखराबाट ७ हजार २ सय ८५ ले परीक्षा दिएका थिए । २ दिनसम्म २ सिफ्टमा परीक्षा संचालन भएको थियो । परीक्षाफल असोज २१ गते सार्बजनिक गर्ने कार्यक्रम रहेको छ ।
यो परीक्षा उतीर्ण परीक्षार्थीहरु २०१६ को कोटामा कोरिया आउनेछन । यसपाली ७ हजार १ सय परीक्षार्थी उतीर्ण गराइने कोरियाको मानव संशाधन विकास सेवा (एचआरडी)ले जनाएको छ । यस मध्ये उत्पादनमुलक क्षेत्रमा ४ हजार ९ सय र कृषि तथा पशुपालन तर्फ २ हजार २ सय कोटा बिभाजन गरिएको छ ।
कोरियाको अध्यागमन विभागले जनाए अनुसार नेपालमा रोजगार अनुमति प्रणाली (ईपीएस) लागु भए यता ३२ हजारभन्दा बढि नेपाली युवा रोजगारीका लागि कोरिया आएका छन् । केहि महिनाअघि उपलब्ध गराइएको तथ्यांक अनुसार आठ बर्षमा ३० हजार ५ सय ३५ पुरुष र २ हजार ५२ जना महिला गरि ३२ हजार ५ सय ८७ नेपाली युवाले रोजगारीको अवसर पाएक हुन् ।
