रोधीँ सांगीतिक सौगातमा अन्जु आउने

धन गुरुङ

सोल-रोधीँ सांगीतिक सौगात ३ का लागि नेपाली सुगम संगीतका महारानी अन्जु पन्त कोरिया आउने भएका छन । कोरियनहरुको महान चाड छुसकको अवसर पारेर तमु धीँ दक्षिण कोरियाले सेप्टेम्बर २७ तारिकको दिन आयोजना गर्न लागेको ” रोधीँ सांगीतिक सौगात भाग ३” ( कर्मा ब्याण्ड लाइभ इन कोरिया ) का लागि गायिका अन्जु पन्त सहित नेपालको चर्चित ब्याण्ड कर्मा र लोकदोहोरीका अहिलेका व्यस्त गायिका कृष्णा गुरुङ कोरिया आउन लागेको हो।

तमु हाउस व्यवस्थापन र प्राकृतिक प्रकोपमा परेकाको सहयोगार्थ आयोजना हुन लागेको उक्त कार्यक्रममा यसअघि चर्चित भर्सटाइल गायिका श्रेयसी चेम्जोङ आउने तय भए पनि घरायसी कारणले उनी आउन नसक्ने भएपछि कोरियाबासी नेपालीलाई मनोरञ्जन दिन अन्जु पन्त कोरिया आउने भएका हुन ।

कहाँ होला घरबार कहाँ होला गाउँ , हुक्क मेरो डल्ले डल्ले नली नलाई खन्न जस्ता नेपाली लोकलयमा आधारित कर्णप्रिय गितहरुका धनी कर्मा ब्याण्ड, नबिर्से तिमिलाई न पाए तिमिलाई, तिमीले पराई ठानेपछी जस्ता सुगम संगीतमा सदाबहार गीतका गायिका अन्जु पन्त र एकादशी बजारमा भेट भाको पोहोरै, म त हजुर नेपाली र दामी देखिन्छ जस्ता लोकदोहोरीमा चर्चित गीतहरु स्रोतमाझ पस्किसकेकी गायिका कृष्णा गुरुङ्ले आफ्ना चर्चित गीतहरुले कोरियामा रहेका नेपालीदर्शकलाई संगीतको तालमा झुमाउने छन ।

यहाँ रहेका नेपालीहरुलाई आपतविपत पर्दा र काम छोडेको बेला बस्न सजिलो होस भन्ने हेतुले तमु हाउसको परिकल्पना सहित यसैको व्यवस्थापन गर्न कार्यक्रम आयोजना गर्न लागिएको तमु धीँका अध्यक्ष सुरज गुरुङले जानकारी दिए । नेपालमा विभिन्न समयमा आईरह्ने प्राकृतिक प्रकोपमा परेका नेपालीहरुलाई सहयोग गर्नु कार्यक्रमको अर्को उदेश्य रहेको छ ।

स्मरण रहोस् गत सलनालमा नेपाल हाउस ब्यवस्थापन समिति द्वारा आयोजना गरेको नेपाल हाउस सांगितिक महामेलामा अन्जु पन्त आउने कुरा धेरै चर्चा चलाएता पनि अन्तिममा विभिन्न कारणबस आउन नसकेका कारण अन्जु प्रति दर्शकहरूले देखेका सपना त्यत्तिकै तुहिईएका थिए भने यस पाली दर्शकहरूको ईच्छा र चाहाना पुरा गर्नका लागि अन्जु पन्तलाई कोरिया बोलाउन लागिएको महासचिब प्रितम गुरूङले बताउँदै सम्पुर्ण नेपाली दाजु भाई दिदी बिहिनीहरूलाई उक्त कार्यक्रममा सहभागी भै भरपुर मनोरञ्जन लिंदै कार्यक्रम सफल पारिदिनु हुन तमु धीं दक्षिण कोरियाको तर्फबाट हार्दिक अनुरोध गरेको छ ।

कर्मा ब्यान्ड लाइभ कन्सर्ट इन कोरिया नाम दिएको कार्यक्रम सेप्टेम्बर २७ मा कोरियाको राजधानी सिओल नजिकैको शहर दोङ्देमुन स्थित छाङसिन स्कुल कन्सर्ट हलमा हुने भएको छ ।