“मेरो त देशै माइती भयो” तीज गीतमा चेलीको वेदना
दक्षिण कोरियाको थेसो क्षेत्रमा नेपाली चेलीहरूको उल्लेखनीय सहभागितासहित छायाङ्कन गरिएको तीज गीत “मेरो त देशै माइती भयो” गत हप्ता औपचारिक रूपमा सार्वजनिक गरिएको छ ।
दिवस तिवारीको शब्द र सङ्गीत तथा लोकप्रिय लोक गायिका पूर्णकला बिसीको सुमधुर स्वरले सजिएको यो गीतले वैवाहिक जीवनमा नेपाली महिलाले भोग्ने भावनात्मक पिडा, विदेशमा बस्दा आउने हर्ष–विषाद र तीज पर्वको मौलिकतालाई मार्मिक रूपमा चित्रण गरेको छ । युट्युब च्यानलमार्फत सार्वजनिक गरिएको गीतले प्रवासमा रहेर पनि नेपाली कला, संस्कृति र चाडपर्वको प्रवर्द्धनमा सशक्त भूमिका खेल्ने विश्वास लिइएको छ । विवाह गरेर देशमा रोजगार नभएपछि परदेशमा बस्नु पर्ने बाध्यात्मक परिस्थितिले गर्दा देश नै माइती भएको गीतको सारांश रहेको छ । त्यसमाथि दैनिक कामको व्यस्तताले, चाड पर्वमा साथीसंगीसँग रमाइलो गर्न समय नमिल्ने नेपाली चेलीको पिडा, वेदना पोखेका छन् ।
गीतको एरेन्ज तथा सङ्गीत संयोजन रमेश सेन्चुरीले गरेका छन् भने रेकर्डिङ, मिक्सिङ तथा मास्टरिङ सुरज भुसालले सम्पन्न गरेका हुन्।
सोनम पराजुलीको निर्देशन तथा छायाङ्कनमा तयार पारिएको म्युजिक भिडियोमा प्रमीला भट्टराई र शोनीप विक्रम शाहीको अभिनय रहेका छन् । साथै, निकिता थापा, दीपिका थापा र प्रीति पाण्डेले आकर्षक नृत्य प्रस्तुत गरेका छन् । भिडियोलाई व्यवस्थित रूपमा सञ्चालन जनक भट्टराईले गरेका हुन् ।
विदेशी भूमिमा बसेका नेपालीहरूका लागि भावनात्मक रूपमा जोडिने यस गीतले तीज पर्वको उल्लासलाई थप रंगीन बनाउनेछ। नेपाली नारीहरूको संवेदना र मौलिक पर्वको महत्वलाई उजागर गर्दै, “मेरो त देशै माइती भयो” तीज गीतले दर्शक–श्रोताको मन जित्ने अपेक्षा गरिएको छ ।
