सिस्नेरीमा पहिरोले पुरिएका ६ खेलाडीका लागि कोरियाबाट डेढ लाख सहयोग
असोज १२ गतेको बाढी पहिरोले एन्फा सिस्नेरी क्याम्पका ६ जना खेलाडी पुरिएर मृत्यु भएका परिवारको लागि दक्षिण कोरियाबाट एक लाख पचास हजार नेपाली रुपैयाँ हस्तान्तरण गरेको छ ।
आइतबार कोरियाको सौलमा नेपाल फुटबल महासङ्घ, दक्षिण कोरियाले अखिल नेपाल फुटबल सङ्घ (एन्फा) का अध्यक्ष पङ्कज विक्रम नेम्बाङलाई जनाही पचीस हजारकाे दरले प्रदान गर्न हस्तान्तरण गरेको हो । एन्फा अध्यक्ष नेम्बाङ सोमबारदेखि हुने कोरियन फुटबल महासङ्घको गोष्ठी र एएफसी अवार्ड समारोहमा सहभागी हुन आइतबार बिहान कोरिया आइपुगेको थियो । उक्त रकम नेपाल फुटबल महासङ्घ, दक्षिण कोरियाको अक्षयकोषबाट सहयाेग गरेको महासचिव राज थापा श्रेष्ठले बताए ।
हस्तान्तरणपछि कार्यक्रममा बोल्दै अध्यक्ष नेम्बाङले उक्त रकमलाई नेपालमा परिवारलाई हस्तान्तरण गर्ने बताए । साथै ६ जना खेलाडीहरूको स्मृतिमा राष्ट्रिय स्तरको फुटबल प्रतियोगिता, सालिक बनाउने लगायतको योजना रहेको बताए ।
सो घटनामा हेटौँडाका अनुपम घलान, मकवानपुरगढीका साइमन योन्जन र इन्द्र सरोवरका दिवस बानियाँ तथा सर्लाहीका आदित्य बलम्पाकी, काठमाडौँका रियान्स आचार्य र बाराका विकल रेग्मीको मृत्यु भएको थियो ।
एन्फा अध्यक्ष नेम्बाङलाई नेपाल फुटबल महासङ्घ, दक्षिण कोरिया सम्मान पत्र र दोसल्लाले सम्मान गरेको थियो । नेपाल फुटबल महासङ्घ, दक्षिण कोरियाको अध्यक्ष कृष्ण गुरुङ (ब्रो तमु)को अध्यक्षतामा कार्यक्रम सम्पन्न भएको थियो ।
