नवीन सुब्बाको ‘गाउँ आएको बाटो’ बुसान फिल्म फेस्टिभलमा छनोट
नवीन सुब्बा निर्देशित फिल्म ‘गाउँ आएको बाटो : अ रोड टु भिलेज’ एसियाको प्रतिष्ठित बुसान फिल्म फेस्टिभलमा छनोट भएको छ । बुसानले वेबसाइटमार्फत यो फिल्म ‘विन्डो अफ एसिया’ विधामा छानिएको उल्लेख गरेको छ ।
नेपाली समयानुसार बिहीबार राति क्यानडाको टोरन्टो फेस्टिभलमा विश्व प्रिमियर हुने तयारीमा रहेको यो फिल्मले अर्को उपलब्धि हासिल गरेको हो ।
सुब्बा निर्देशित ‘गुडबाई काठमाण्डु’ पनि सन् २०१७ मा बुसानमा प्रिमियर भएको थियो ।
बुसानले फिल्मको प्रदर्शन मिति भने उल्लेख गरेको छैन । यद्यपि, सातदेखि १३ अक्टोबरभित्र फिल्मको एसिया प्रिमियर हुने जनाएको छ । बुसानमा कलाकार, निर्माता र निर्देशक सबै जना उपस्थित हुने तयारी रहेको बताएको छ ।
टेलिश्रृंखला ‘दलन’ र फिल्म ‘गुडबाई काठमाण्डु’ पछि यो उनको कमब्याक फिल्म हो । फिल्ममा अभिनेता दयाहाङ राई, पशुपति राई, पर्सन राई, खनुमा राई, केशव राई, प्रमिशा राईलगायतको अभिनय छ । फिल्मलाई भोजपुरसँगै धरान, संखुवासभामा छायांकन गरिएको हो ।
एसियन सिनेमा अन्तर्गत नै नेपाल र भारतको संयुक्त निर्माणमा बनेको ‘गुराँस’ र एसियन लघु फिल्मतर्फ ‘साक्षी रुख’ छनोटमा परेको छ ।
