कोरियामा २९औँ विश्व आदिवासी दिवस अगष्ट २० मा मनाउने
नेपाल आदिवासी जनजाती महासंघ(नेफिन) दक्षिण कोरियाले २९औँ विश्व आदिवासी दिवस मनाउने भएको छ । आगामि अगष्ट २० तारिख सौलमा आदिवासी दिवस मनाउन लागेको महासंघले जनाएको छ ।
“रैथाने ज्ञान, सीप, कला, साहित्य एवं मौलिक खाद्य परम्पराहरुलाई संरक्षण प्रबर्द्धन र बिकास गर्दै, पहिचान र अधिकार प्राप्तिको सांस्कृतिक आन्दोलनमा एकाकार बनौं” भन्ने मुल नाराका साथमा नेपाल आदिवासी जनजाति महासंघ द.कोरियाको मुल आयोजनामा विश्व आदिवासी दिवस मनाउन लागेको हो । उक्त कार्यक्रम नेफिन बुसान शाखा र जेजु शाखाका साथमा कोरियामा रहेका आदिवासी जनजातिका विषयमा क्रियाशील संघ-संस्थाहरुको सह-आयोजनामा हुन लागेको हो ।
नेपाली रैथाने कला साहित्य संस्कृति एव रैथाने खाद्य परम्परालाई संरक्षण प्रबर्द्धन एवं बजारीकरण गर्ने कार्यक्रमको मुख्य उद्देश्य रहेको संस्थाका अध्यक्ष विशन राईले बताए । “यसपालिको आदिवासी दिवस पहिचानको पक्षमा सांस्कृतिक आन्दोलनको रुपमा मनाउने तय भएको छ । कोरियामा भएका सबै साथीभाइको सक्रीय सहभागिताको लागि अनुरोध छ ।” अध्यक्ष राईले अनुरोध गरे ।
कार्यक्रममा दक्षिण कोरियामा रहेका जनजाती समुदायहरुको मौलिक सांस्कृतिक नृत्य एवं झाकी तथा परम्परागत मौलिक परिकारहरु प्रदर्शन हुने छ । साथै विभिन्न मातृभाषा एवम् उत्पीडन समुदायको हकहित, अधिकार र पहिचान एवं आदिवासी सौन्दर्य शास्त्रमा लेखिएका साहित्य सिर्जनाहरूको प्रस्तुतिको साथै अन्य सांस्कृतिक प्रस्तुति रहने जनाएको छ ।
कार्यक्रमको तयारी पनि पुरा भैसकेको महासंघको कार्यवहाक अध्यक्ष शुभराज बोम्जनले जानकारी दिएका छन् । “महासंघमा आवद्ध समुर्ण संघ संस्थाहरुलाई सामन्वय गर्दै कार्यकमको सम्पूर्ण तयारी पुरा भाईसकेको छ ।” बोमजनले बताए ।
संयुक्त राष्ट्रसङ्घले अगष्ट ९ लाई विश्व आदिवासी दिवसका रुपमा मनाउने घोषणा गरेपछि सन् १९९४ देखि हरेक वर्ष विश्वका आदिवासीले यो दिवस मनाउन थालेका हुन् ।
