कोरियामा प्रथम अन्तर्राष्ट्रिय बुद्धिष्ट सांस्कृतिक महोत्सब सम्पन्न
कोरियाली बहुसांस्कृतिक बौद्धधर्म संघद्वारा आयोजित प्रथम अन्तर्राष्ट्रिय बुद्धिष्ट सांस्कृतिक महोत्सब छुङ्छननाम्दो आसानको युवोन युनिभर्सिटीमा आईतबार भव्यताका साथ सम्पन्न भएको छ ।
कार्यक्रममा श्रीलंका बौद्धधर्म महासंघ प्रमुख धर्मगुरू माकुलेवी विमला महानायके थेरोको प्रमुख आतिथ्यता सहित विभिन्न देशका बौद्धधर्म गुरू, हजारौंको संङख्यामा बौद्ध धर्मलम्बीहरूको उपस्थिती रहेको आयोजक संस्थाका सदस्य तथा थेग्छेन छ्योईलिङ सउल नेपाल गुम्बाका संस्थापक कुन्साङ दोर्जे लामाले जानकारी दिनुभयो ।
दक्षिण कोरिया, नेपाल, श्रीलंका, थाइल्याण्ड, बंगलादेश, भियतनाम, कम्बोडिया, म्यानमार, मंगोलिया लगायत ९ देशको संयुक्त महोत्सबमा सहभागी सबैप्रति आयोजक संस्था र कोरियास्थित श्रीलंका महाबिहारका अध्यक्ष धम्मा कितिले सम्बोधनका क्रममा धन्यावाद ब्यक्त गरेको छ ।
महोत्सबको उद्धेश्यमा शान्तिमय संसारको लागि पाँच शुभकामनाहरू आयोजक संस्थाले संयुक्त रूपमा प्रस्तुत गरेका थिए । जसमा क्रमशः 1.बुद्धको उपदेश मान्ने सबै एक हुन् । 2. त्रि रत्न प्रति आस्था र भरोसा गर्नेछु । 3. हामी वातावरण संरक्षण गर्ने जीवन अभ्यास गर्ने छौं । 4. भेदभाव रहित समाज, समानता र शान्ति चाहन्छु । र 5. दक्षिण र उत्तर दुई कोरियाबीच शान्तिको कामना गर्दछु । रहेको थियो ।
विभिन्न ६ देशको मौलिक खाना परिकारसहित आ-आफ्नै स्टलको व्यवस्था रहेको महोत्सबमा एक सयभन्दा बढी भिक्षु भिक्षुणीहरूलाई बिहान १० बजे भिक्षट्न सुरू गरेर १ घण्टा अवधीको औपचारिक कार्यक्रम २ बजे समापन भएको थियो ।
