दक्षिण कोरियामा गुरुङ चलचित्र ‘बारा-पोखरी’ प्रदर्शन हुँदै
धेरै लामो समयपछि दक्षिण कोरियामा गुरुङ भाषाको चलचित्र ‘बारा-पोखरी’ प्रदर्शन हुने भएको छ । चलचित्रलाई दक्षिण कोरियामा बसोबास गर्नुहुने तमूहरुको छाता संस्था तमु धींले आयोजना गर्ने भएको हो । सउल स्थित यही आउँदो मे महिना २१ तारिक केन्द्रले प्रदर्शन गर्ने भएको छ भने बुसान शाखा र थेगु शाखामा पनि प्रदर्शन मिति छिट्टै नै सार्वजानिक हुने भएको छ ।
पुरानो कथा वस्तुमा सिमित ट्रेन्डलाई तोडेर समसामयिक वर्तमान परिवेशभित्र रहेर चलचित्र तयार पारिएको निर्माण पक्षको दाबी रहेको छ । नेपालका गाउँहरु विशेष गुरुङ गाउँहरु दिन प्रतिदिन रित्तिदै गएका कारणहरु, त्यसले निम्त्याएका समस्याहरु देखि लिएर आफ्नो गाउँठाउँ प्रतिको माया मोह र सँगै गाउँ संरक्षणका निम्ति के कस्ता जिम्मेवारीहरु हुन सक्छन् भन्ने सन्देश चलचित्रमा देखाइएको छ । लमजुङ जिल्लाको दोर्दी पालिका १२ थर हिले गाउँ र समुद्री सतहबाट ३२०० मिटर उचाईमा रहेको बारा-पोखरी लगायत काठमाण्डौमा समेत छायाकन गरिएको यस चलचित्रमा लभस्टोरी पक्षलाई पनि सशक्त रुपमा प्रस्तुत गरिएको छ ।
कोरोनाको भयावह अवस्थामा आवश्यक सामग्रीहरुको अभावको बावजुद पनि भरपुर मेहनेतका साथ तयार पारिएको यस चलचित्रका निर्माता तथा लेखक ज्ञानेन्द्र गुरुङ हुन् । उनी आफै पनि कोरियामा निकै लामो समय बसोबास गरेर नेपाल जानुभएको हुनाले आफ्नो पहिलो कोशिसलाई कोरियावासी साथीहरुले माया गरिदिनुहुनेछ भन्ने कुरामा आशावादी हुनुभएको छ । गुरुङ पहिलो गुरुङ (Rapper) र्यापर पनि हुनुहुन्छ । उहाँको क्रियशनहरु उहाँकै युट्युब च्यानल (Gyanendra gurung) मा हेर्न सक्नुहुनेछ ।
७०% गुरुङ भाषा,३०% नेपाली भाषामा तयार पारिएको यस चलचित्रमा नेपाली भाषाको सबटाईटल पनि राखिएको हुनाले गैर तमू साथीहरुले पनि सहजै बुझ्न सकिने हुँदा सम्पुर्ण कोरियाबासी तमु तथा गैर तमु साथीहरुलाई चलचित्र हेरेर माया गरी सहयोग गरिदिनुहुन आयोजक साथै निर्माण टोलीले हार्दिक अनुरोध गर्नुभएको छ ।
मिति :- २०२३-०५-२१ आईतबार
समय :- दिनको १२:०० बजे
स्थान :- 종로구민회관, 서울 종로구 지봉로5길 7-5 (पुजा रेस्टुरेण्ट र लुम्विनी रेस्टुरेण्टको पछाडी)
