‘सपनाको देश कोरियामा’ विमोचन

सोलुखुम्बु समाज दक्षिण कोरियाका अध्यक्ष राजु राईद्धारा लेखिएको पुस्तक ‘सपनाको देश कोरियामा’ विमोचन भएको छ । कोरियाली नयाँ वर्ष सलनालको पहिलो दिन शनिबार समाजको २० औं स्थापना दिवस पारेर पुस्तक विमोचन भएको हो । सोही कार्यक्रममा समाजको स्मारिका पनि विमोचन भएको थियो ।
कार्यक्रममा पूर्वाञ्चल सरोकार समाज कोरियाका अध्यक्ष अमृत राईको प्रमुख आतिथ्यमा सम्पन्न भएको थियो । उनले संस्थाले २०औ स्थापना दिवसको अवसरमा स्मारिका प्रकाशन गरेकोमा बधाई दिदै पुस्तक सपनाको देश कोरियामा संग्रह माथि चर्चा गर्दै आफू पनि २७÷२८ वर्ष अघि ठूलो सपना बोकेर कोरिया प्रवेश गरेको बताए । त्यही सपना पूरा गर्न गरेका हजारौं संघर्ष बारे आफुलाई पनि लेख्ने इच्छा जागेको बताए । त्यस्तै मधुवन साहित्यिक प्रतिष्ठान नेपालका अध्यक्ष कवि जीवन खत्री, आदिवासी जनजाति लेखक संघ कोरियाका संयोजक कवि पराजित पोमुले पुस्तक माथि चर्चा र सुझाव दिएका थिए ।
समाजको बार्षिक साधारणसभामा कोषाध्यक्ष प्रविन राईले आर्थिक प्रतीवेदन प्रस्तुत गरेका थिए भने सचिव वसन्त नाछिरिङ्ले वार्षिक प्रतिवेदन पेस गरेका थिए । त्यसैगरी विधान संशोधन समितिका संयोजक युगेल तेन्डुप शेर्पाले उक्त बार्षिक साधारण सभा संसोधित विधान प्रस्तुत गर्दै संसोधित विधानका दफा, उपदफा माथी प्रस्ट पारेका थिए । साधारण सभाको बहुमतले संसोधित विधानलाई अनुमोदन गरेको थियो ।
सोलुखुम्बु समाजको स्मारिकामा संस्थाको सुरुवाती चरणदेखि अहिलेसम्म संस्थाले गर्दै आएका सामाजिक गतिबिधिहरु समेटिएका छन् । साथै सोलुखुम्बु जिल्लाको आन्तरिक पर्यटन प्रवर्द्धन गर्ने उदेश्यका साथ सोलुखुम्बु जिल्ला भित्रका १ नगरपालिका र ७ गाँउपालिकामा रहेका धार्मिक, साँस्कृतिक ऐतिहाँसिक स्थलको लेख तथा रचनाहरुलाई समेत समेटिएको संस्थाको अध्यक्ष राजु राईले बताए ।