नेपाल आइक्यापको सदस्य बन्ने निश्चित
सोल-नेपालले एसियाका सत्तारुढ र बिपक्षी राजनीतिक दलहरुको संगठन ‘इन्टरनेशनल कन्फरेन्स अफ एसियन पार्टीज” (आइक्याप) को सदस्यता प्राप्त गर्ने निश्चित भएको छ । नेपाल सरकारले यसको बडापत्र (एमओयु) मा शुक्रबार हस्ताक्षर गरेसंगै आइक्यापको सदस्यता पाउने निश्चित भएको हो ।
एमओयुमा नेपाल सरकारका तर्फबाट दक्षिण कोरियाका लागि नेपाली राजदूत कमानसिंह लामाले आइक्यापका महासचिब छुङ इयूल योङको उपस्थितिमा सोलस्थित नेपाली राजदूताबासमा हस्ताक्षर गरेका थिए ।
५३ देश संलग्न आइक्यापको सदस्यता बन्न नेपालले एक बर्षअघि आशय पत्र पठाएको थियो । छ महिनाभित्र सदस्य राष्ट्रहरु मध्ये बहुमतले नेपाललाई सदस्यता प्रदान गर्ने आशय जनाएपछि नेपालले औपचारिक रुपमा पाँच बर्षका लागि सदस्यता प्राप्त गर्नेछ । आज भएको सम्झौता निर्णयका लागि सदस्य राष्ट्रहरुलाई आइक्याप सचिबलायाले पठाउने छ ।
आज भएको सम्झौताले आइक्यापको गतिबिधि र कार्यक्रमहरुमा सहभागी हुन नेपाललाई बाटो खुलेको छ ।
एसियाका सत्तारुढ र प्रतिपक्षी दलहरुबीच सहयोग र अनुभव आदानप्रदान गर्ने उद्धेश्यले सन् २००० को सेप्टेम्बरमा मनिलामा यसको स्थापना भएको थियो । आइक्यापमा हाल ३ सय ६० दलहरु संलग्न छन् ।
