कोरियामा निधन भएका राजेशका परिवारले पाए साढे चार लाख रुपैंया आर्थिक सहयोग

कोरियामा निधन भएका विधार्थी राजेश पाण्डेयको परिवारलाई स्याङ्जा परिवार र नेपाली विधार्थी समाज (SONSIK) को संयुक्त पहलमा संकलित ४३ लाख १८ हजार १ सय ९२ कोरियन वोन (करिब साढे चार लाख नेपाली रुपैंया) राहत र सान्त्वना स्वरुप मृतकको सहोदर भाई अच्युत पाण्डेयलाई हस्तान्तरण गरिएको छ । Encephalitis (Autoimmune) नामक रोग लागेका पाण्डेय दक्षिण कोरियाको सउलस्थित 가톨릭대학교 은평성모병원 मा उपचारार्थ रहँदै गर्दा गत अगष्ट २७ मा निधन भएका थिए ।

दुई संस्थाको संस्थागत पहलमा संकलित रकम स्याङ्जा परिवार दक्षिण कोरियाका केन्द्रीय अध्यक्ष विजय थापा, केन्द्रीय वरिष्ठ उपाध्यक्ष विपना गुरुङ, केन्द्रीय निवर्तमान अध्यक्ष तथा सल्लाहकार युवराज गुरुङ, नेपाली विधार्थी समाज (SONSIK) का सहसचिव दिवाकर चौलागाईं, मृतकको सहोदर भाई अच्युत पाण्डेय र आफन्त लक्ष्मण बोगटी लगायतको उपस्थितिमा उक्त सहयोग रकम हस्तान्तरण गरिएको हो ।

स्याङ्जा जिल्लाको कालीगण्डकी गाँउपालिका २ कोटाकोट स्थायी घर भई ६ वर्ष अघि अध्ययनको शिलशिलामा कोरिया आएका २८ वर्षीय मृतक पाण्डेयको उपचार खर्च करिब १ करोड ५० लाख आएको र दुई संस्थाले सामूहिक विज्ञप्ति सार्वजनिक गर्दै सहयोगको अपिल गरेको थियो । उनी अस्पतालको सघन (आईसियु) कक्षमा विगत तीन महिनादेखि उपचाररत थिए ।

यस दु:खद घडीमा मृतकप्रति भावपूर्ण श्रद्धाञ्जली र शोकसन्तप्त परिवारप्रति हार्दिक समवेदना प्रकट गर्दै मानविय संवेदना सहित सहयोगमा जुट्नुहुने सबै मनकारी व्यक्ति र संस्थाप्रति स्याङ्जा परिवार र नेपाली विधार्थी समाज (SONSIK) ले हार्दिक धन्यवाद व्यक्त गरेको छ ।