आदिवासी जनजाति साहित्यकार/लेखक महासंघ दक्षिण कोरियाले मनायो आदिवासी दिवस
![](https://www.fonijkorea.net/wp-content/uploads/2022/08/297634601_1193209071530048_5367492118768436831_n-800x450.jpg)
आदिवासी जनजाति साहित्यकार/लेखक महासंघ दक्षिण कोरियाले आइतबार ‘आदिवासी जनजाति आन्दोलनमा साहित्यको भूमिकाः हिजो आज र भोली’ नामक कार्यक्रमको आयोजना गरेर अन्तराष्ट्रिय आदिवासी दिवस मनाएको छ । कार्यक्रममा कवि लेखक भूपाल राई र लेखिका कुमारी लामाले आदिवासी साहित्यको विभिन्न पक्षमा आफ्नो विचार राखेका थिए ।
जुम मार्फत भएको कार्यक्रममा लेखक राईले साहित्यमा अहिले जनजातिका आक्रोसका विभिन्न पक्ष आएको बताएका छन् । ‘अहिले गरिरहेको साहित्य आक्रोशको सेरोफेरोमा छ । अबको समय हाम्रो पुर्खाले हाम्रो लागि राखेको प्राज्ञिक ज्ञान र विश्व दृष्टिकोण आउनु पर्यो । साथै अब हामी भनेको लेखक साहित्यकार भएर मात्र नहुने रहेछ । त्यो कही न कही राजनैतिक पार्टीमा गएर जोडिनु पर्ने रहेछ । मैले यो पार्टी त्यो पार्टी भन्न मिल्दैन तर अब जनजातिका विषयलाई पूरा गर्ने पार्टी हुनु पर्छ ।’
त्यस्तै लेखिका कुमारी लामाले जनजातिहरु राज्यबाट धेरै पहिले देखि नै हेलामा पारिदै आएको बताइन् । ‘राज्यले नै एउटै भाषा एउटै भेष भन्नु नै जनजातिका संस्कार संस्कति मास्नु हो । म राम्रो नेपाली बोल्छु अग्रेजी पढाउँछु तर तामाङ भाषा आउँदैन । यो राज्यको संरचना ठीक नभएकोले यस्तो समस्या भएको हो ।’ उनले भनिन् ।
झन्डै दुई घन्टा चलेको कार्यक्रममा कोरियामा रहेका विभिन्न साहित्यसँग सम्वन्धित व्यक्ति र संघसंस्थाका प्रतिनिधि सहभागी रहेको थियो । कार्यक्रममा वक्ताका रुपमा हरेका साहित्यकार आहुती स्वस्थ्य समस्याका कारण सहभागि हुन नसकेको महासंघका संयोजक पराजित पोमूले जानकारी गराएका थिए । ‘उहाँका स्वस्थ्यमा समस्याका कारण आजको कार्यक्रममा आउनु भएन । हामीले पनि छोटो समयमा कार्यक्रम गर्नु परेकोले धेरै साथीभाइलाई जानकारी गराउन सकेनौं ।’