स्याङ्जा परिवार दक्षिण कोरियाको २४औं वार्षिक साधारण सभा सम्पन्न
कोरिया स्थित स्याङ्जा परिवारले कोरियन नयाँ वर्ष सलनालको अवसर पारेर आइतबार २४औं वार्षिक साधारण सभा सम्पन्न गरेको छ । संस्थाको एघारौं कार्यसमितिको वितेको एक वर्षको प्रगति विवरण, आर्थिक प्रतिवेदन प्रस्तुत गर्दै भावी कार्ययोजनाको विषयमा छलफल गर्ने उद्धेश्यले भर्चुअल जूम मार्फत उक्त साधारण सम्पन्न भएको हो ।
संस्थाका केन्द्रीय अध्यक्ष विजय थापाको सभापतित्वमा सम्पन्न सो कार्यक्रममा प्रमुख अतिथिको रुपमा नेपाली राजदूतावास सउल कोरियाका कार्यवाहक राजदूत रामसिंह थापा, विशेष अतिथिहरु एनआरएनए कोरियाका अध्यक्ष दिपक पुन, नेपाली सम्पर्क समितिका अध्यक्ष श्री प्रसाद श्रेष्ठ, स्याङ्जा सहयोग अन्तर्राष्ट्रिय समन्वय समितिका अध्यक्ष टुकराज अर्याल र अतिथिहरुमा संस्था वरिष्ठ सल्लाहकार, सल्लाहकार, शाखाका अध्यक्षहरु, कोरियास्थित विभिन्न संघ-संस्थाका अध्यक्षहरु लगायतले कार्यक्रम सफलताको शुभकामना सहित आ-आफ्नो शुभकामना मन्तव्य व्यक्त गरेका थिए ।
संस्थाको उपाध्यक्ष भक्त थापाको स्वागत मन्तव्यसँगै शुरु भएको उक्त अधिवेशनमा संस्थाका सहसचिव सुशिल अर्यालले प्रगति प्रतिवेदन र सम्पूर्ण आर्थिक आयव्यय विवरण संस्थाका कोषाध्यक्ष मञ्जु गुरुङ र कमल रेग्मी “धनु”ले प्रस्तुत गरेका थिए । संस्थाको किम्हे बुसान शाखाका अध्यक्ष कमल अर्याल र थेगु शाखाका उपाध्यक्ष शरण न्यौपानेले सम्बन्धित शाखाको प्रगति विवरण प्रस्तुत गरेका थिए । कार्यक्रमलाई थप रोचक र संगीतमय बनाउन नेपालबाट जूम भर्चुअल मार्फत जोडिएर राष्ट्रिय कलाकारहरु खुमन अधिकारी, शंकर विरही गुरुङ, सबिना गुरुङ, सुमन थापा मगर, विक्रम परियार लगायतले सांगीतिक प्रस्तुति दिएर मनोरञ्जन दिएका थिए ।
जूम भर्चुअलमा लेसन गुरुङ/बोम्जन गुरुङको विशेष प्राविधिक सहजीकरणसँगै कार्यक्रम सञ्चालन संस्थाका केन्द्रीय सचिव माधव अर्यालले गरेका थिए । स्याङ्जा परिवार दक्षिण कोरियाको २४औं वार्षिक साधारण सभालाई सफल बनाउन प्रत्यक्ष, अप्रत्यक्ष रूपमा जूम भर्चुअल मार्फत जोडिएर सहयोग गरिदिनुहुने उपस्थित समस्त महानुभावहरुलाई आयोजकले हार्दिक धन्यवाद व्यक्त गरेको छ ।
