वालिङ नगरपालिकालाई कोरियाबाट सवा चार लाख रुपैंया सहयोग ।
बोम्जन गुरुङ
२६ मे २०२१ कोरिया ।
स्याङ्जा जिल्लाबाट दक्षिण कोरिया आएका वालिङ नगरपालिका भित्रका एक युवा समूहले आफ्नो नगरपालिकालाई झण्डै सवा चार लाख रुपैंया अर्थात चार लाख तेईस हजार सात सय अन्ठानब्बे रुपैंया सहयोग गरेको छ । वर्तमान कोरोनाको फैंलिदो विषम परिस्थितिमा नेपालका सबैजसो स्थानहरुमा जस्तै वालिङ पनि प्रभावित भएकोले कोरोना संक्रमण नियन्त्रणमा सघाउ र बिरामीहरुको हेरचाहको निमित्त सो संकलित रकम नगरपालिकाको बिपत कोषमा जम्मा गरिएको हो ।
कोरियामा रहेर पनि आफ्नो जन्मभूमिप्रतिको अगाध माया सहितको अमूल्य सहयोगप्रति धन्यवाद व्यक्त गर्दै सहयोग रकमको पूर्ण सदुपयोग हुने वालिङ नगरपालिकाका प्रमुख दिलीपप्रताप खाँणले बताए । विशेष गरि उपचारार्थ कोभिड संक्रमित बिरामीको लागि औषधी, अक्सिजन, सन्तुलित खाना, एम्बुलेन्स साथै भ्याक्सिनमा खर्च गरिने साथै सहयोगीहरुको नामावली अभिलेख सुरक्षित राख्दै आम्दानी र खर्चको विवरण सार्वजनिक गर्न नगरपालिका प्रतिबद्ध रहेको जनाए ।
कोरोनाको कहरले विश्व समुदाय यतिखेर आक्रान्त बनिरहेको अवस्थामा नागरबासीको सवालमा सदैव उत्तरदायी रहँदै आएको वालिङ नगरपालिकालाई हौसला स्वरुप सहयोग जुटाएको उक्त समूहका एक अभियन्ता राजन गैह्रेले बताए । आफ्नो मातृभूमिमा परेको यो मानवीय संकटमा सानो राहत र सहानुभूतिका लागि सहयोग गर्न पाउँदा अभियानमा सहभागी सन्दिप डुम्रेले खुशी व्यक्त गरे । मेसेन्जर ग्रुपबाट उठेको उक्त रकममा १०५ जनाले स्वेच्छिक रुपमा सहयोग संकलनमा जुटेका थिए ।
उता स्याङ्जा परिवार दक्षिणले कोभिडकै महामारीको नियन्त्रण र राहतको लागि सहयोग संकलन अभियान सञ्चालन गरिरहेको छ । वर्तमान कोभिडको यो बिपत, त्रास र जोखिम न्यूनीकरणका लागि मनकारी व्यक्तित्वहरुलाई यही मे २८ सम्म सञ्चालन अभियानमा सहभागिताका लागि अनुरोध गर्दै संस्थाले हार्दिक अपिल गरेको छ ।
जनघनत्व, आवश्यकता र अवस्था अनुसार संकलित रकम जिल्लाभित्रका सबै पालिका र क्षेत्रमा न्यायोचित वितरण हुने स्याङ्जा परिवारले जनाएको छ । गत वर्ष स्याङ्जा सहयोग समाज अन्तर्राष्ट्रिय समन्वय समितिको मातहतमा रहने गरि दक्षिण कोरियाबाट स्याङ्जा परिवारले ५० थान पि.पि.ई. उपलब्ध गराएको स्याङ्जा परिवार दक्षिण कोरियाका केन्द्रीय अध्यक्ष विजय थापाले जानकारी गराए ।
