जनसम्पर्क समिति दक्षिण कोरिया फुटको संघारमा

नेपाली कांग्रेसको भातृ संगठन जनसम्पर्क समिति दक्षिण कोरियामा विवादका कारण फुटको संघारमा पुगेको छ । जनसम्पर्ककी सभापति आस्था विन्दु मल्लले आइतबार दुई जना कार्यसमिति सदस्य र पाँच जना सल्लाहकार मनोनयन गरे पछि विवाद झन बढेको हो ।
नेपाली कांग्रेसको महासमिति प्रतिनिधि भजिन्द्र क्षेत्रीका अनुसार बिगत दुई वर्ष अगाडि सन् २०१८ मे ५ तारिखमा सौलमा आस्था बिन्दु मल्लको नेतृत्वमा निर्वाचित कार्यसमितिले दुई वर्षको लागि निर्वाचित भएको बताए । सो समय अबधीलाई गत वर्ष २०२० को मे महिनामा पुरा गरेको भए पनि आपतकालीन अवस्था सृजना भएमा र महाधिबेसन गर्न अनुकूल नभएको खण्डमा विधानले ६ महिना समय बढाउन सुविधा दिएको उनले बताए । ‘छ महिना बढाउने सुविधा सभापतिलाई छ । तर सभापतिले बढाइएको समयलाई गणना गर्दै नगरि उल्टै समय सकिए पनि अधिबेशनको प्रक्रिया सुचारु नगरि क्रियाशिल सदस्यता आठ महिनादेखि नेपालबाट ल्याएर वितरणको कार्य सुचारु गर्न गरेन । कोरियामा गत वर्ष नै राष्ट्रिय निर्वाचन सम्पन्न भएको थियो जबकि कोरोना भाइरस संसारभरी महामारीको रुपमा फैलिँदै थियो तर जनसम्पर्क समितिका निवर्तमान सभापति गिरिराज कुवँर र बर्तमान सभापति मल्लको मिलेमतोमा निर्बाचनको मिति घोषणा नगरि साधारण सदस्यताको गूगल फारम भराउने र त्यसपछि मिति तय गर्ने भनिएकोमा सभापतिले क्रियाशिल सदस्य संयोजक आफैं बनेर उल्टै जुम बैठक सञ्चालन गरी सभापतिको चाहना भए सधैंभरि मनोनित गर्न पाइने भन्ने उर्दी जारी गर्नु भयो । उनले भने ।
जनसम्पर्क समितिका सल्लाहकार विपिन कुमार गुरुङ पनि अहिले सभापतिले अधिवेशन नगरेर थप मनोनयन गर्नु आफैमा विधान अनुसार नभएको बताए । ‘विधान अनुसार नै अहिलेको कार्यसमितिको कार्यकाल सकिसकेको छ । झन यही समयमा सभापतिले आफ्ना मान्छेहरु मनोनयन गर्नु विधान अनुसार पनि मिल्दैन । त्यसैले हाम्रो माग भनेको यो निर्णय तुरुन्तै खारेज होस र अधिवेशन गर्नु पर्यो ।’ उनले भने ।
त्यस्तै उपसभापति लक्ष्मण दाहालले पदावधि सकिएको समितिले चाँडो महाधिबेसन गराएर निकास दिनुपर्नेमा महाधिबेसन नगर्ने र भर्ती मात्र गरिएपछि अब सँगै हिँड्न नसकी आफ्नो नेतृत्वमा महाधिबेसन आयोजक समिति गठन गरेर चाँडै महाधिवेशन गर्ने पनि जनाए । उनले अहिलेको कार्यसमितिमा पनि आफ्नो पक्षमा दुई तिहाई सदस्य रहेको जिकिर गरे । ‘नेपाली कांग्रेसका हरेक भातृ तथा शुभेच्छुक संस्थाहरुको अधिवेशनमा निर्वाचित हुनेहरूले शासन सञ्चालन गर्ने र निर्वाचनमा पराजय बेहोरेको तर संगठनमा अत्यन्त दुःख गरेका व्यक्तिहरूलाई पुरै पाखा लगाउने हिसाबले जनसम्पर्क समिति कोरियाको महाधिवेशनमा प्रतिनिधि नभएका र पार्टीको क्रियाशिल सदस्य समेत नरहेका मानिसहरूलाई सल्लाहकार र केन्द्रीय सदस्य मनोनित गरेर निर्वाचनमा पराजय बेहोरेका सबै व्यक्तिहरूलाई अर्को संगठनको जसरी व्यबहार गरिँदै आएको छ ।’ उनले गुनासो पोखे ।