महिला आवास गृह संचालनार्थ किम्हे बुसानमा चलचित्र “छ माया छपक्कै” प्रदर्शन हुने

दक्षिण कोरियाको किम्हे बुसानमा संचालन भैरहेको महिला आवास गृह(नानाआङा धिम)को दीर्घकालीन ब्यबस्थापन गर्ने उदेश्यले चलचित्र “छ माया छपक्कै” प्रदर्शन गर्ने भएको छ । तामाङ समाज ख्यङसाङ बुसानले गर्न लागेको यस चलचित्रको प्रदर्शन नोवेम्बर १७ मा किम्हेको मुन्ह्वावन हलमा हुने जनाएको छ ।

दक्षिण कोरियाकै औद्योगिक क्षेत्रको रुपमा परिचित किम्हे बुसान क्षेत्रमा विदेशी कामदारहरुको बाक्लो उपस्थिति रहेको छ । त्यस्तै वैदेशिक रोजगारीको लागी आएका नेपालीहरु पनि उल्लेख मात्रामा रहेको यस क्षेत्रमा केहि आवास गृह(सेल्टर) संचालनमा रहेपनि महिलाहरूका लागी भनेर छुट्टै आवास गृह थिएन । यसै कुरालाई मध्यनजर गर्दै करिब १० महिना अगाडि तामाङ समाज ख्यङसाङ बुसानले महिलाहरुलाई लक्षित गरि “नाना आङा दिम किम्हे”को स्थापना गरेको हो । यसै आवास गृहलाई दीर्घकालीन ब्यबस्थापन गर्ने उदेश्यले उक्त चलचित्र प्रदर्शन गर्न लागेको संस्थाका अध्यक्ष सुजित घिसिङले जानकारी दिएका छन् ।

“सेवानै धर्म हो” भन्ने भनाईलाई आत्मसात गर्दै कोहि पनि काम छाडेको, बिरामी परेर कम्पनी बाहिर बस्नु परेको र अन्य जुनसुकै समस्यामा परेको दिदीबहिनीहरूलाई सहयोग पुगोस् भन्ने उदेश्यले नाना आङा धिमको सुरुवात गरेको जानकारी दिदै यसमा सबैले सहयोग गर्न अध्यक्ष घिसिङले अनुरोध गरेका छन् । “समाजिक भावनाले गर्न लागेको यस चलचित्र प्रदर्शनबाट प्राप्त सम्पुर्ण आमदानी नानाआङा धिमको दीर्घकालीन ब्यबस्थापनमा खर्च गर्नेछौं । त्यसैले किम्हे बुसान क्षेत्रमा रहनु भएका सम्पूर्ण नेपाली दाजुभाई तथा दिदीबहिनीहरूलाई उक्त दिन उपस्थित भएर मनोरन्जनको साथमा सामाजिक कार्यमा सहभागी हुन विनम्र अनुरोध गर्दछु।” घिसिङले भने ।

हाल सम्ममा करिब ४० जना भन्दा बढी महिला दिदिबहिनीहरुले उक्त आवास गृहबाट सुबिधा लिइसकेको तामाङ समाज ख्यङसाङ बुसानले जनाएको छ ।

दिप्रेन्द्र लामाको कथा र निर्देशनमा बनेको उक्त चलचित्रमा दिपकराज गिरी, केकी अधिकारी, केदार प्रसाद घिमिरे (माग्ने बुढा), जितु नेपाल (मुन्द्रे), स्वपुष्प भट्टा, बुध्दि तामाङ (हैट), प्रकाश घिमिरे, रमा थपालिया, शिशिर भडेल, अनुराघ कुवाँर, बिष्णु सापकोटा, सबिन बास्तोला, बसन्त भट्टा, शारदा गिरी, दिपक क्षेत्री, सुनिता गौतम, राजनी गुरूङ, कुमार गजुरेल, सन्देश लामिछाने, देव जोशी, प्रदिप न्यौपाने र भिम श्रेष्ठ लगायतका कलाकारहरूको अभिनय देख्न सकिन्छ ।