ईपीएस प्रणाली खारेजीको माग गर्दै राष्ट्रपति भवन अघि धर्ना

दक्षिण कोरियामा रहेका विदेशी कामदारहरुले सउलको ख्वांगह्वामुनमा रहेको राष्ट्रपति निवाश अगाडी धर्ना दिदै संयुक्त राष्ट्रसंघबाट मनाउने १८ औ अन्तराष्ट्रिय प्रवासी मजदुर दिवस आइतबार मनाएको छ । प्रवासी मजदुर युनियन (एमटियु)ले आयोजना गरेको कार्यक्रममा सउल आसपासका विदेशी कामदारको समभागिता थियो ।
उक्त कार्यक्रमलाई सम्बोधन गर्दै एमटियुका अध्यक्ष उदय राईले कोरियामा रहेका विदेशी कामदारहरुले ईपीएस प्रणाली मार्फत कामदार बनेर आउँदा धरै दुःख भोग्न परेको बताए । ‘न कामदारले चाहेको अनुसार कम्पनी फेर्न सकिन्छ न चाहे अनुसारको कम गर्न । त्यसैले यो इपिएस सिस्टमलाई परिमार्जन गर्दै नयाँ र बैज्ञानिक शैली अपनाउनु पर्छ ।’ उनले भने । ‘१६ देशका बिदेशी कामदार छौ । हामीले सबै देशमा पनि यहाँको अबस्थाको बारेमा जानकारी गराएका छौ । तर सम्बन्धित देशहरुले समेत खासै वास्ता गर्दैनन् ।’ उनले थपे ।
हाल ईपीएस प्रणालीमा प्रवासी श्रमिकहरुले स्वइच्छाले कम्पनी परिबर्तन गर्न नपाउने, तलब सुबिधा भने जस्तो नहुने जस्ता समस्यालाई लिएर एमटियुले लामो समय देखि आन्दोलन गर्दै आईरहेको हो । अहिले कोरियामा सरकारले तलब बढाए पनि कम्पनीहरुले काम घटाउने क्रम जारी छ ।
प्रवाशी मजदुरहरुले खानेबस्ने खर्च सम्बन्धि निर्देशिका खारेज गर्नु पर्ने, कम्पनी ब्यबसायीले प्रबासी श्रमिकको तलब घटाउन गरिएको माग फिर्ता लिनु पर्ने, इपिएस अन्तर्गतको श्रमिकले थेजिकम कोरियामै पाउनु पर्ने, ३ बर्ष पछि थप गरिने १ बर्ष १० महिनाको भिषा कम्पनी मालिकको अनुमति बिना थप गर्न पाउनु पर्ने, श्रमिकले आफ्नो परिवार कोरियामा झिकाउन पाउनु पर्ने जस्ता माग एमटियुले राख्दै आएको छ ।
पाँच बर्ष भन्दा बढी अवधिसम्म काम गर्नु पाउनु पर्ने, कम्पनी परिबर्तन गरेको श्रमिकले पनि कमिटेड श्रमिकको रुपमा आउन पाउनु पर्ने, कृषि क्षेत्रमा कार्यरत श्रमिकलाई भेदभाब गर्ने मजदुर कानुनको धारा ६३ खारेज गर्नु पर्ने, कृषि क्षेत्रको श्रमिकले पनि उत्पादन क्षेत्रमा काम गर्न पाउनु पर्ने, प्रवासी श्रमिक र परिवारको अधिकार रक्षाको निमित्त संयुक्त राष्ट्र संघबाट जारी कन्भेन्सनलाई कोरियन संसदबाट अनुमोदन गर्नु पर्ने लगायतका माग पनि एमटियुको रहेको छ ।
राष्ट्रपति भवन अघि बिरोध सभा गर्न पहिले विरोध र्याली सउलको बिभिन्न भागमा परिक्रममा गर्दै राष्टपति भवन अघि पुगेको थियो । सो धर्नालाई कोरियाका सञ्चार माध्यमले माध्यमहरुले प्राथमिक्ताका साथ प्रत्यक्ष प्रशारण गरिएका थिए ।