‘विद्यार्थीहरुको लागि परिणाममुखी कार्य गर्नेछु’, सोनसिक सभापतीका उम्मेद्वार रमेश परियार 

कोरियामा अध्ययरत नेपाली विद्यार्थीहरुको संगठन, नेपाली विद्यार्थी समाज दक्षिण कोरिया (सोनसिक) को १५ औॅ साधारण सभा यहि सेप्टेम्बर १ र २ मा तारिखमा हुदै छ । १५ औॅ साधारण सभा नजिकिदै गर्दा कोरियामा अध्ययनरत नेपाली विद्यार्थी, बुद्धिजीवी तथा सम्पूर्ण नेपालीहरुबिच अबको नेतृत्व कस्तो हुने भन्ने बारे चर्चा चल्दै गरेको छ । यहि सेरोफेरोमा सोनसिकको १५ औॅ साधारण सभामा सभापतिको उम्मेद्वारको रुपमा चर्चामा रहेका छन् रामेश परियार । विभिन्न लेख रचनाको माध्यमबाट आफ्नो स्वतन्त्र विचार राख्दै आएका, परियार बिगतमा सोनसिक समितिको विभिन्न तहमा रहेर काम गरिसकेका छन् । वोनखोङ्ग विश्वविद्यालयमा पि.एच. डि. अध्ययनरत रमेश परियारले यसपटकको सोनसिकको सभापतिका लागि औपचारिक घोषणा नगरे पनि सभापतिका दावेदार उमेदवारको रुपमा देखिएका छन, उनै दावेदार रमेश परियारसँग फोनिज कोरियाले गरेको कुराकानी:

सोनसिकको १५ औॅ साधारण सभामा सभापतिको रुपमा तपाईको चर्चा छ उम्मेद्वारी किन अहिले सम्म घोषणा नगर्नु भएको ?

सोनसिकको विधान अनुसार औपचारिक रुपमा उम्मेद्वार घोषणा चुनाव कै दिन हुने हुदा अहिले नै औपचारिक उम्मेद्वारको घोषणा नगरेको हो ।  तर अग्रजहरु र साथीहरु बिचको कुराकानीमा आफु पनि उम्मेद्वार हुने इच्छा राखेर आवश्यक सुझाब, सल्लाह माग्दैछु ।

सभापती मै उम्मेद्वारी दिन लाग्नुको कारण ?

विगतमा लामो समयदेखि सोनसिकका क्रियाकलापहरुमा सक्रिय रहदै आएको छु । सोनसिकको कार्यसमितिमा रहेर अथवा सोनसिक कार्यसमिति भन्दा बाहिर रहेर एक्लै पनि बिद्यार्थिहरुको हितमा आफुले सकेको काम गर्दै आएको छु । यो अन्तरालमा मलाई विद्यार्थीहरुको लागि देखिने गरि परिणाममुलक काम गर्नको लागि टिममा बसेर काम गर्नु पर्छ भन्ने अनुभव भयो । सोनसिक भनेको सबै बौद्धिक मानिसहरुको संगठन भएको र यदि म सभापति भएको खण्डमा सबै सँग सहकार्य गरेर धेरै परिणाममुखी कार्य गर्न सकिन्छ भन्ने विश्वासले मैले मैले उम्मेद्वारी दिन लागेको हो ।

तपाईका चुनाबी एजेन्डाहरु के के रहेका छन् ?

सोनसिक स्थापना हुँदाको परिवेश र अहिलेको परिवेश ज्यादै फरक छ । हामीले अब अहिलेको समय अनुसार सोनसिकका कार्यशैलिहरुलाई परिमार्जन गर्न सकेनौ भने सोनसिकप्रतिको विद्यार्थीहरुको विश्वास गुम्दै जान्छ । जसले गर्दा विद्यार्थीहरु बिचको सहकार्य र एकतामा नकारात्मत असर पर्न सक्छ । तसर्थ हामी विद्यार्थीहरु बिचको एकताको केन्द्रको रुपमा रहेको सोनसिकलाई एक ढिक्का बनाएर समय सापेक्ष सुधार गर्ने र कोरियामा रहेका अबसरहरुको अधिकतम प्रयोग गरेर विद्यार्थीहरुको चौतर्फी विकास कसरी गर्न सकिन्छ भन्ने कुरालाई केन्द्रमा राखेर मैले आफ्नो एजेन्डाहरु प्रष्ट रुपमा बनाएको छु । ति सबै एजेन्डाहरु म आगामी साधारण सभामा प्रस्तुत गर्ने छु ।

तपाईलाई आफु विजय हुन्छु भन्ने आधारहरु के के हुन. त ?

आधार नै नभई त कोहि उम्मेद्वार बन्दैन, म विजय हुन्छु भन्दा पनि सबै जनाले मलाई विजय गराउनु हुनेछ भन्ने कुरामा म विश्वास्त छु र यस्तो बिश्वास हुनुको आधार भनेको नै मेरो अहिलेसम्मको सोनसिक प्रतिको लगाव र काम, मैले उठाएका मुद्दाहरु, मेरो नैतिकता र ईमान्दारिता नै हो। म आफु सोनसिकमा हुदॉ र नहुदॉ पनि आफुले सक्ने कार्यहरु निस्वार्थ भावले गर्दै आएको छु। मैले उठाएका एजेन्डाहरु सम्पूर्ण कोरियामा रहेका नेपाली विद्यार्थीहरुको एजेन्डा भएकोले र सोनसिक बौद्धिक मानिसहरुको संगठन भएकोले हाम्रोलाई भन्दा पनि राम्रोलाई विजय गराउनु हुनेछ भन्ने कुरामा म ढुक्क छु ।

चुनाव नजिकिदै गर्दा चुनाबको तयारी कस्तो गर्दै हुनुहुन्छ ?

चुनावको प्रचारप्रसार भन्दा पनि आफुले उठाएका एजेन्डाहरु सम्पूर्ण विद्यार्थीहरुसम्म पुर्याउनु पर्छ भन्ने मेरो मान्यता छ । विद्यार्थीहरु रचनात्मक हुनुपर्छ भन्ने धारणाले पुरानो शैली भन्दा पनि नयाँ तरिकाले आफ्ना कुराहरु सबै सामु पुरेयाउने सोचले सामाजिक संजाल मार्फत लिखित तथा भिडियो संदेशहरु सकेसम्म सबै सामु पुराउने कोसिस गरेको छु । आशा छ तपाइको यो अन्तरबार्ताको माध्यमबाट पनि धेरै सामु मेरो कुराहरु पुग्ने छ । विद्यार्थीहरुले भड्किलो प्रचारप्रसार गर्नु भन्दा पनि आफ्नो एजेन्डा मजबुत बनाउनु पर्छ भन्ने मलाई लाग्दछ। सबैलाई भेटेर आफ्नो कुरा राख्दा राम्रो हुने भए पनि कोरियामा विद्यार्थीलाई यो त्यति सहज नहुने हुदा मैले सामाजिक संजालको प्रयोग गरेको छु । सम्पूर्ण बौद्धिक साथिहरुले यसलाई सहज रुपमै लिनु भएको छ भन्ने प्रतिक्रिया पनि पाएको छु ।

अन्तमा केहिँ भन्न चाहनु हुन्छ ?

कोरियामा अध्ययनरत सम्पूर्ण विद्यार्थी साथीहरु र अग्राजहरुलाई साधारण सभामा उपस्थिति जनाइदिन हुन हार्दिक अनुरोध गर्दछु । सोनसिकलाई सबै विद्यार्थीहरुको साझा थलो बनाएर यस संस्थाको गरिमालाई अझैँ माथि पुराउन सबै मिलेर जानुको विकल्प नभएको हुदा हामी सबै मिलेर हातेमालो र सहकार्य गर्दै अघि बढौं भन्न चाहन्छु । सोनसिकलाई नयाँ धारले अघि बढाउन र मेरा एजेन्डाहरु मन परेमा सुझाब, सल्लाह र भोट गरेर सहयोग गर्दिनु होला भनेर पनि सबैलाई बिनम्र अनुरोध गर्दछु ।