मगर संघ कोरियाद्वारा स्याङजाको बिद्यालयलाई ५० हजार
गिता राना मगर
पोखरा-नेपाल मगर संघ कोरियाले भुकम्पबाट पूर्ण रुपमा क्षती भएको एक विद्यालयलाई ५० हजार रुपैया सहयोग प्रदान गरेको छ । जिल्लाको ओरष्टे गाविस वडा नम्बर ७ पाटनेमा रहेको नवज्योति प्रा. वि.लाई संघले विद्यालय मर्मतसंभारका लागी ५० हजार नगद प्रदान गरेको हो । बिहीबार विद्यालय प्राङगणमा आयोजित कार्यक्रममा नेपाल मगर संघ स्याङजाका अध्यक्ष हेमन्त थापा मगरले विद्यालयका प्रध्यानाध्यापक तेजमाया शर्मालाई रकम हस्तान्तरण गरेका हुन् |
सहयोग हस्तान्तरण कार्यक्रममा वोल्दै नेपाल मगर संघ स्याङजाका अध्यक्ष हेमन्त थापा मगरले बैदेशिक रोजगारको शिलसिलामा विदेशी भुमिमा भएर पनि नेपालमा आएको भुकम्पबाट पूर्ण रुपमा क्षती भएको विद्यालयलाई सहयोग गरेकोमा नेपाल मगर संघ कोरियालाई विशेष धन्यवाद ब्यक्त गरे । वैदेशिक रोजगारमा रहेर आफ्नो खाना खाजा खर्च कटाएर नेपालीको जन्मभुमिमा विपदमा परेको पिडामा मल्हम लगाउने काम गरेर ठूलो गुन लगाएको आफुहरुले कहिल्यै नविर्सने उनको भनाइ रहेको थियो ।
कार्यक्रममा वोल्दै राहत वितरणका चांजोपांजो मिलाउने ओरष्टेका स्थानियबासी दिलिप थापा मगरले आफुले कोरियामा रहेको नेपाल मगर संघ कोरियाका अध्यक्ष खड्गवहादुर थापा मगर र कोरियामा रहेका गोकर्ण थापा मगरको सहयोगमा गाउमा रहेको विद्यालय सम्म सहयोग रकम जुटाउन सफल भएको वताए । भु कम्पका कारण मुलुकका विभिन्न जिल्लाहरुमा भौतिक तथा मानविय क्षती भएजस्तै आफ्नो ठाउमा पनि भविष्यका कर्णधार विद्यार्थीहरुले अध्ययन गर्ने विद्यालयलाई प्राथमिकतामा राखेर सहयोगका लागी आफुले कोरियामा रहेका साथीहरुसंग समन्वय गरेको उनको भनाइ थियो ।
ओरष्टे गाविसका गाविस सहायक सचिव राजु गुरुङले सरकारी विद्यालयलाई सरकारी सहयोग वारे अहिलेसम्म केही सहयोगको चांजोपांजो नमिलेको भएतापनि स्थानियको पहलमा झुप्रो निर्माण गरी विद्यार्थीहरुलाई अध्यापन गराइरहेको वेलामा नेपाल मगर संघ कोरियाले सहयोग गरेर थप उर्जा प्रदान गरेको वताए ।
विद्यालय ब्यवस्थापन समिति तथा नेपाल मगर संघ ओरष्टेका अध्यक्ष हुमबहादुर राना मगरले विदेशमा रहेर पनि मगरहरुको पहलमा मगर गाउँका वालवालिकाले अध्ययन गर्ने विद्यालयमा सहयोग गरेर ठूलो गुन लगाएको वताए । नेपाल मगर संघ कोरियाको सहयोगले आफुहरुले भुकम्पबाट पूर्ण रुपमा क्षती भएको विद्यालयलाई पुन निर्माणमा खर्च गर्नेमा ढुक्क हुन समेत आग्रह गरे । भु कम्पबाट पूर्ण रुपमा क्षती भएको नवज्योति विद्यालयमा २९ जना विद्यार्थीहरु अध्ययनरत छन भने तीन जना शिक्षक शिक्षिकाहरुले अध्यापनरत छन ।
