मर्स कम हुने संकेत
फोनिज कोरिया संवाददाता
सोल- कोरियामा गत मे २० देखि संक्रमणको रुपमा फैलिएको मिडल इस्ट रेस्पिरेटोरी सिन्ड्रोम (मर्स) को सङ्क्रमण कम हुने सङ्केत देखिएको छ ।
यहाँका स्वास्थ्य अधिकारीहरुले सङ्क्रमणको प्रभाव घट्दो मात्रामा रहेको जनाएका छन् । उनीहरुले पहिलेको तुलनामा उपचारका लागि बिरामी कम आउन थालेको र नियन्त्रणको सङ्केत देखापरेको बताएका हुन् ।
शुक्रबार १ जनाको मृत्यु हुनका साथै थप चारजना सङ्क्रमित भेटिएको जनाइएको छ । यो सङ्क्रमणका बिरामीको सङ्ख्या १६६ पुगेको बताइएको छ । यस सङ्क्रमणबाट २४ जनाको ज्यान गएको कोरियाली स्वास्थ्य अधिकारीहरुले जनाएका छन् ।
पछिल्लो तथ्याङ्कअनुसार सङ्क्रमितहरुको सङ्ख्या पछिल्लो समयमा आएर घट्दो मात्रामा रहेको पाइएको छ । करिब तीन हप्ताअघिमात्र चारजनामा यसको सङ्क्रमण देखिएको थियो । त्यसयता यसको सङ्क्रमण त्यहाँ दिन प्रतिदिन बढ्दो मात्रामा रहेको थियो । कोरियाली स्वास्थ्य मन्त्रालयले दिएको जानकारीअनुसार कोरियाली अधिकारीहरुले यस सङ्क्रमणको प्रभाव घटाउन विभिन्न कार्यक्रम सञ्चालन गरिएको र सतर्कता अपनाइएको छ ।
आवश्यक मात्रामा सतर्कता अपनाउन नसकेको भन्दै सरकारको आलोचना गरिएको छ । तर विश्व स्वास्थ्य संगठनका प्रमुखले कोरियाले जारी राखेको स्वास्थ्य उपचार पर्याप्त रहेको धारणा बिहीबार दिएका थिए ।
