एनआरएन बुसानद्धारा इटहरीका विपन्न परिवारलाई ब्लाङ्केट वितरण
काठमाण्डौ
गैर आवासीय नेपाली संघ (एनआरएनए) दक्षिण कोरियाको क्षेत्रीय कमिटी एनआरएन बुसानले नेपालका गरिब तथा विपन्न परिवारलाई राहत स्वरूप ब्लाङ्केट वितरण गरेको छ।
एनआरएन बुसानले एक नाम एक मान नामाक अभियान संचालन गरी प्रति व्यक्ति दश हजार वन संकलन गर्दा उठेका नेपाली एक लाख रुपैयाँ बराबर को ब्लाङ्केट खरिद गरी वितरण गरेको थियो।
शुक्रबार सुनसरी स्थित इटहरी उपमहानगरपालिका वडा न. ८ हरिजन वस्तिका गरिब तथा विपन्न ४८ घरपरिवारलाई ब्लाङ्केट वितरण गरिएको छ। स्थानीय जनप्रतिनिधिसंग समन्वय गरि विपन्न परिवारका पनि वृद्ध ,असहाय ,अशक्त तथा विरामीलाई प्राथमिकता दिएर वितरण गरिएको थियो ।
कोरियाबाट आएका एनआरएन बुसानका प्रतिनिधि अंशुबर्मा लिम्बुले चिसोमा कठ्याग्रीएका गरिब तथा विपन्न वर्गका पीडामा केही मल्हम लगाउन यो अभियान संचालन गरिएको बताए । विगतमा पनि कोरियाबाट विभिन्न सामाजिक परोपकारका कार्यहरु हुने गरेको जानकारी पनि दिए। एनआरएन बुसानका अध्यक्ष चन्द्र कुबिर लिङ्देनको संयोजनमा अभियान संचालन गरिएको थियो ।
वितरण कार्यक्रममा वडाका जनप्रतिनिधि , नेपाल पत्रकार महासंघ सुनसरीका अध्यक्ष अमर खड्का ,इटहरी एफ.एमका अध्यक्ष चेतन धमला लगायत विभिन्न राष्ट्रिय मिडियाका सञ्चारकर्मीको उपस्थिति थियो ।
